Rơwang hrơi tơjuh Bôh thâo – Tuai cuă ngui Gia Lai thun 2023 pơphun mơ̆ng 11 truh lơ 18/11 hăng tơlơi gum hrŏm mơ̆ng năng ai ñu 1.000 čô mơnuih thâo phiăn juăt đưm amăng tơring čar pô hăng tơring čar pơkon. Amăng anun, tơlơi kiăng lăi lĕ Festival bôh thâo čing hơgor Gia Lai 2023 tum pơƀut grŭp mơnuih thâo phiăn juăt đưm mơ̆ng 17 bôh tơring glông, plơi prong amăng đơ đam tơring čar hăng hơdôm bôh tơring čar kual Dap Kơdư. Kiăo tui lĕ hơdôm phiăn jơnum ngui pha ra kah hăng phiăn jơnum ngui bơnga ang – čư̆ apui kơdir Čư̆ Dang Ya (tơring glông Čư̆ Păh); jơnum ngui waih song ƀơi ia krông Pô Cô (tơring glông Ia Grai). Tal anai, ƀơi plơi prong Plei Ku ăt pơphun mơn hơdôm phiăn jơnum ngui ƀơi jơlan amăng plơi prong; pơdŏng glăi bôh thâo đưm djuai ania, phiăn ngă yang bôh thâo đưm; pơdă prưng gông brô̆ Dap Kơdư.

Tô̆ tui Rơwang hrơi tơjuh Bôh thâo – Tuai čuă ngui Gia Lai, ƀơi plơi prong Plei Ku pơphun Hrơi Jơnum ngui tuai čuă ngui thun 2023 hăng Pri pơplông đuăi Gia Lai City Trail – Tơlơi čang čư siăng. Tuai čuă ngui hăng mơnuih ƀôn sang dưi lăng hơdôm tơlơi atông čing mơ-ak ƀơi anăp bah amăng war Ia Nueng (Biển Hồ). Gah yŭ tơ-ui kyâu hngô mơtah rơ-ơ̆ lĕ, pơdă prưng Plei Ku Đưm hăng Ră Anai, hăng 100 pok rŭp lăi kơ ană mơnuih, anih anom hiam, plơi prong, bôh thâo, jơnum ngui ƀơi Plei Ku mơ̆ng thun 1975 truh ră anai. Ơi Ngô Văn Hào – Khua Khul Nai pơtô hăng čơđai sang hră, pô rŭp anun brơi thâo:

 “Rŭp hơđăp kâo hmâo anih dưm rak pioh mơ̆ng thun 2008 truh ră anai. Rŭp anai ƀu hmâo tơlơi pơsit pô ñu ôh, hơdôm plăng facebook leng kơ dưm đĭ. Kâo ngă pơhrua tui, djeo rŭp phrâo kah hăng rŭp sô hơđăp, kiăng arăng pơhmu nao rai. Sa dua čô mơnuih lăi rŭp đưm hiam, hmâo mơnuih lăi lĕ Plei Ku anai rơnuk anai. Kâo kiăng mơnuih ƀôn sang Plei Ku lăng glăi rŭp đưm; ƀing hlăk ai lăng ƀuh plơi prong Plei Ku pơđĭ kyar kah hăng ră anai lĕ hmâo pran jua gum hơgôp mơ̆ng lu rơnuk nao hlâo hăng neh wa djop djuai ania amăng tơring čar”.

Sa tơlơi kiăng lăi mơ̆ng Hrơi Jơnum ngui tuai čuă ngui 2023 tal anai lĕ pơplông đuăi “Gia Lai City Trail – Tơlơi čang čư̆ siăng” hăng tơlơi gum hrŏm mơ̆ng 4000 čô mơnuih pơplông đuăi. Glông jơlan pơkă đuăi 5km, 10km, ha bơnah marathon (21km) hăng rơwang djop marathon (42km) leng kơ dưi dăp hơdră pơphun mơ̆ng anih anom hiam Ia Nueng (Biển Hồ), găn hơdôm đang čè hăng glông kyâo hngô mơtah ha rơtuh thun, găn bah amăng war Sang phơ̆t đưm Bửu Minh, nao pơ̆ čư̆ Dăng Ya kơñĭ hyak kơ bơnga ang ƀơi tơring glông Čư̆ Păh. Glông jơnum đuăi lĕ jơlan amăng plơi prong, jơlan amur, kơdư dơnung, ƀrô djơ̆ bơyan hiam hloh mơ̆ng čư̆ siăng Gia Lai. Yă Nguyễn Thị Hậu Hiền, hmâo giăm truh 70, hrŏm hăng sang anô̆ mơ̆ng Hà Nội nao pơ̆ Plei Ku čuă lăng hăng gum hrŏm pơplông đuăi, hur har pran jua lăi:

 “Čư̆ apui kơdir hăng bơnga ang, anih anom hiam biă; hmâo kyâo hngô tui anai, ayuh hyiăng klă hơdjă. Ană mơnuih Plei Ku lĕ lăng hmač biă. Anăn pri pơplông đuăi lĕ Tơlơi čang čư̆ siăng, anai jing tơlơi čang mơ̆ng kâo sui hăng anai laih. Ră anai dưi gum hrŏm pơplông đuăi ƀơi anai hăng anih anom hiăm hrŏm hăng sang anô̆, kâo mơ-ak biă”.

Tui hăng Grŭp pơphun bruă pơplông lĕ, pri pơplông đuăi trail – đuăi kah hăng tơđar pơkĕ hrŏm đĭ čư̆ ƀơi anih anom kơdư dơnung pha ra blung a dưi pơphun ƀơi Gia Lai, pri thun anai hmâo pơjing rai sa dua pran ngă pơhưč prong hăng khul mơnuih đuăi đơ đam dêh čar. Amăng mrô mơnuih pơplông đuăi tal anai hmâo lu mơnuih đuăi tom hmâo mă pri prong ƀơi hơdôm tal pơplông đơ đam dêh čar ăt kah hăng ƀơi anih pơplông jar kơmar. Pri hmâo čơkă mă tơlơi đing nao, dŏng yua mơ̆ng 35 bôh anom, anom bơwih ƀong hăng rơbêh kơ 1 klai prăk mơta hăng lu gơnam tam pơkon. Rơngiao kơ mă yua kơ bruă pơphun, sa črăn prăk amra mă yua kơ tơlơi hơdip mơda mơnuih mơnam ƀơi plơi prong Plei Ku hăng gum hơgôp kơ Keh prăk “Ao pơđao kơ adơi”.

Ơi Nguyễn Xuân Hà – Khua Anom bôh thâo tơlơi pơhing plơi prong Plei Ku, tơring čar Gia Lai brơi thâo: hăng hơdôm bruă jơnum ngui bôh thâo, bơkơjăp drơi jăn, adôh suang pha ra ha jăn, Hrơi jơnum ngui tuai čuă ngui thun 2023 mơ̆ng plơi prong Plei Ku hmâo ba glăi laih hơdôm tơlơi găn rơgao mơ-ak pioh kơ mơnuih ƀôn sang hăng tuai čuă ngui. Anai ăt lĕ tal pioh tơring čar lăi pơhưč gru rŭp ană mơnuih thâo jum tuai, anih anom hiam hăng bôh thâo mơ̆ng Plei Ku.

 “Hơdôm hrơi rơgao, hơdôm bôh ƀirô anom bruă, hơdôm bôh phường, hơdôm mơnuih thâo phiăn juăt đưm hmâo pơhrăm klă, čang rơmang tuh rơyuh pran jua kơ tuai čuă ngui hăng mơnuih pơplông ƀơi hơdôm kual lŏn nao dưi lăng ƀuh gru hiam bôh thâo đưm hăng tơlơi thâo jum tuai mơ̆ng mơnuih ƀôn sang Plei Ku. Rơgao kơ anai, plơi prong kiăng mơ-ĭt tơlơi pơhing plơi prong Plei Ku thâo jum tuai hăng jing anih anom čư̆ siăng mơtah yua kơ tơlơi suaih pral”.

Hrơi jơnum ngui Tuai čuă ngui plơi prong Plei Ku thun 2023 pơphun mơ̆ng lơ 17-19/11 ƀơi Kual tuai čuă ngui anih anom hiam Ia Nueng (Biển Hồ), să Biển Hồ (plơi prong Plei Ku). Gum hrŏm hăng hrơi Jơnum ngui, tuai čuă ngui mơ̆ng lu bơnah dưi pơhrua hrŏm pô amăng tơlơi bôh thâo đưm pha ra mơ̆ng djuai ania ƀơi plơi pla rơgao hơdôm črăn hơdră pơdah atông čing hơgor, pơdŏng glăi sa dua phiăn juăt đưm bôh thâo mơ̆ng neh wa djop djuai ania, pơdă prưng rup Plei Ku Đưm hăng Ră Anai, rŭp tuai čuă ngui Plei Ku... Rơngiao kơ anun, nao pơhmư̆ Hrơi jơnum ngui, tuai čuă ngui dô̆ dưi čơkă mă anô̆ mơngưi mơ̆ng gơnam ƀong huă pha ra ƀơi Gia Lai, hơdôm gơnam OCOP. Hăng hơdôm bruă jơnum ngui bôh thâo - tuai čuă ngui na nao dưi pơphun amăng blan 11/2023, hmâo pơdah gru grua bôh thâo lu mơta, pha ra mơ̆ng neh wa djop djuai ania. Hrŏm hăng anun lăi pơhưč tơhnal gal tuai čuă lăng ngă pơhưč mơ̆ng tơring čar Gia Lai./.