Hơdôm hrơi anai, ƀơi hmua pơdai ƀiă či puih laih ƀơi plơi A Lao, să Mang Yang, tơring čar Gia Lai, sang anŏ ơi Ngưm hrŏm hăng lu sang anŏ, glăk ječ ameč yuă pơdai bơyan puih phang đah mơ̆ng hmao jao glăi lŏn kơ Kơčăo bruă mrô 3 pơkra jơlan rơdêh đuăi hmar Quy Nhơn – Pleiku. Mah ha bơnah lŏn hmua hơmâo kơnuk kơna mă pơhrui, samơ̆ ană plơi tŭ ư, yua dah pơmin nao kơ tơlơi hơdip jơnap pơ anăp adih. Ơi Ngưm lăi, plơi A Lao hơmâo 51 boh sang hơmâo lŏn kăng pơpha brơi či ngă jơlan, laih anun abih bang sang anŏ mă laih prăk kơnuk kơna duh lŏn, jing ƀing ñu tah, ruh hĭ abih laih anih anom, war sang, koh drôm hĭ laih kyâo amăng đang hmua či jao glăi lŏn:“Neh met wa gơmơi bơni biă kơ Kơnuk kơna lơ̆m pơsit man pơkra jơlan anai. Abih bang neh wa amăng plơi tŭ ư soh yơh. Kah hăng lŏn sang anŏ gơmơi anai hơmâo amăng anih pơkra jơlan lĕ 2 ar pơdai hăng 1 ar kơphê; gơmơi koh drôm laih kyâo, phun pla, laih anun jao glăi hlao mơtăm yơh či man pơkra jơlan”.

Hăng tơlơi pơtrun, jao lŏn dơ̆ pă lĕ pơkra dơ̆ anun, ƀơi Kơčăo bruă črăn sa hăng 3, anih hơmâo pơklaih ala lŏn čuk pơkra jơlan rơbêh 70%, hơdôm anom bruă hơmâo iâu pơhrui hơdôm rơtuh boh măi, rơdêh, hrŏm hăng hơdôm rơbâo čô mơnuih ngă bruă 3 ca 4 kíp či man pơkra amăng bưng pơđoh ia hăng pơkra djŏp mơta gah yŭ tơdrông tua hăng amăng luh.

Amăng anun, hơdôm ƀĕ tơdrông tơtua akŏ phun kah hăng tơdrông An Nhơn, tơdrông găn nao ia krông Sông Kôn, Hà Nhe, hăng tơdrông tơtua đĭ hăng ngŏ jơlan rơdêh đuăi hmar Kơdư – Dơnung hơmâo pok pơhai ngă tañ hlâo kơ bơyan hơjan truh. Ơi Đoàn Minh Hoàng – Pô pơphô bruă krăp lăng Kông ti pơčruh ngăn Pơphô bruă VNC, anom bruă krăp lăng bruă man pơkra tơdrông tua An Nhơn 4 brơi thâo: “Tơdrông tơtua An Nhơn 4, ră anai hơmâo klơi 12/24 ƀĕ gong tŏ đĭ, bruă pơkra tañ 50% gong tŏ đĭ. Ră anai, pô tuh pơ alin jao laih lŏn či pơkra tơdrông. 2 bơnah akiăng tơdrông hơmâo man đĭ laih. Ră anai gah lăm tơdrông, gơmơi tơguan pơtâo čuah pơsơi pơsă či man pơkra dong”.

Kơčăo bruă jơlan rơdêh đuăi hmar Quy Nhơn – Pleiku glông năng ai 125 km, prăk man pơkra rơbêh 43.700 klai prăk, găn nao 16 boh să, phường mơ̆ng tơring čar Gia Lai, bơbeč djơ̆ rơbêh 4.600 boh sang anŏ hăng lŏm pơhrui glăi rơbêh 1.907ha. Truh lơ 4/5/2026, mrô lŏn hơmâo jao glăi či ngă Kơčăo bruă črăn 1 (22km) hơmâo 70,5%; Kơčăo bruă črăn 3 (25km) hơmâo 72%. Kơnong kơčăo bruă črăn 3 (68km) glăk ngă giong hră pơ-ar či man pơdong amăng blan 5 thun 2026 Hrŏm hăng anun, bruă čuk pơkra lŏn či ngă jơlan, 10/12 boh plơi pơdong phrâo rôk jơlan ăt hơmâo ngă ha amăng plĕ, him lăng jao lŏn kơ mơnuih ƀôn sang ngă sang amăng blan 6/2026.

Ơi Phạm Xuân Tỉnh, Kơ-iăng khua Khul git gai Kơčăo bruă črăn 1 (gah Khul wai lăng hơdôm ring bruă man pơkra jơlan glông hăng anih anom sang dŏ tơring čar Gia Lai) brơi thâo, bruă pơklaih ala lŏn pok ngă jơlan rah, ƀrô man pơdong rah jing bruă ngă tañ hloh, pơhlom brơi jơlan dưi pơkra djơ̆ hăng hrơi mơ̆ tơring čar kiăng: “Truh mông anai, bruă pơhrui lŏn čuk pơkra či ngă jơlan djơ̆ hăng tơlơi kiăng mơ̆ng anom bruă gơgrong man pơkra mơn. Gơmơi hrŏm hăng pô gơgrong man pơkra ngă hrŏm hăng anom bruă bơdjơ̆ nao sem lăng tong ten bruă prăp lui pơtâo čuah, gơnam či man pơkra jơlan, tui hăng tơlơi pơkă mơ̆ng kơčăo bruă, đah mơ̆ng man pơdong dưi wai lăng anŏ kjăp hăng hrơi pơkă ngă giong”.

Jơlan rơdêh đuăi hmar Quy Nhơn – Pleiku yom biă mă hăng tơring čar Gia Lai, yua dah amra pơjing jơlan pơtruh yom biă plah wah kual ter hang ia rơsĭ Dơnung Tong Krah hăng kual dap kơdư mơ̆ng tơring čar, djru pơtruh nao rai kual, plai ƀiă rơngiă prăk pơdŭ pơgiăng laih anun pok prong tui anih đĭ kyar. Yua hnun, hơdôm boh tơring hăng anom bruă gơgrong man pơkra jơlan glăk pơƀut ngă bruă tañ, pơhlom dưi man pơkra giong djơ̆ hăng tơlơi pơkă./.