Hăng akŏ pia “Gia Lai-Lŏn mơnai glai klô trun nao pơ ia rơsĭ jơngeh”, Thun tuai čuă ngui gưl dêh čar 2026 ba sa tơlơi pơhiăp kơ bruă pơtruh nao rai plah wah kual lŏn mơnai glai klô čư̆ siăng Dap Kơdư hăng kual ia rơsĭ tong krah dêh čar plah wah glai klô kyâo pơtâo hing ang hăng gru grua hiam djop djuai ania phara biă mă.

Anai lĕ mông gêh găl pioh kơ Gia Lai lăi pơthâo hăng rŏng lŏn tơnah hơdôm rơnoh yom gru grua lŏn mơnai glai klô hăng ană mơnuih hơmâo gru grua hiam phara kual lŏn Dap Kơdư. Amăng thun 2026 him lăng amra hơmâo abih bang 244 mơta tơlơi jơnum, bruă ngă pơdjơ̆ nao gru grua, tuai čuă ngui hăng pơrơguăt drơi jăn amăng abih ha thun pơphun bruă tuai čuă ngui ƀơi Gia Lai hăng lu tơring čar pơkŏn amăng dêh čar. Tơlơi kiăng lăi nao, Jơnum prong pơphun Thun tuai čuă ngui gưl dêh čar -Gia Lai thun 2026, amra pơphun amăng tlam mơmŏt lơ 28/3 ƀơi phường Quy Nhơn. Amăng mông jơnum pơphun bruă mă anun, tơring čar Gia Lai amra jơnum ngă hrŏm ĕp bruă sĭ mơdrô tuh pơ alin amăng thun 2026, him lăng amra jao hră tuh pơ alin hăng kĭ hră ngă hrŏm lu kơčăo bruă tuh tia pơkra ming, apui yua ia jâo, jơlan glông, pơdong pưk sang sĭ mơdrô bơwih bơwăng truh pơ bruă tuai čuă ngui. Hrŏm hăng anun, lu bruă mă găn rơgao sit nik hyu lăng đang hmua amra hơmâo pôr pơthâo amăng jơlan hơdră kah hăng, lăi pơthâo kơphê čơkă tuai hyu ĕp lăng amăng đang hmua; lăi pơthâo mơnong ƀong huă ƀơi tơring čar; lu tơlơi pơplông pơkơjăp drơi jăn hiam mơak biă mă.