Găn rơgao rơbêh 42 thun akŏ pơdong hăng đĭ kyar, truh ră anai amăng plơi hơmâo 210 boh sang anŏ hăng 950 čô, hơmâo 27 čô ping gah. Amăng anun, mrô sang anŏ rin dŏ glăi năng ai 6%, amăng plơi hơmâo 3 phung djuai ania ƀiă anun lĕ Tày, Bahnar hăng Jarai. Neh met wa amăng plơi hơdip mơ̆ng bruă ngă hmua pla pơjing, ngă pơdai ia dua bơyan hơmâo 146 ha, pla hơbơi plum hơmâo 180 ha, pla kơtor, rơtă hơmâo 6 ha, prăk pơhrui yap tui akŏ mơnuih hơmâo năng ai 41 klăk prăk/sa čô/sa thun.

Hơdôm thun laih rơgao, hơdôm khul grup kơđi čar mơnuih mơnam hăng mơnuih ƀôn sang Plei Kte prong A hơmâo ngă klă djŏp bruă iâu pơthưr, kơtưn khăp kơ lŏn ia, phun ñu lĕ iâu pơthưr “Abih bang man pơdong plơi pla phrâo, plơi prong rơgơi”, “pơplih tơlơi pơmin, hơdră ngă bruă amăng kual mơnuih ƀôn sang djuai ƀiă đah mơ̆ng hrưn đĭ tơklaih ƀun rin”.