Tơdơi kơ năng ai 1 thun man pơkra, samơ̆ Jơlan Nguyễn Chí Thanh, glông mơ̆ng jơlan Trường Chinh truh pơ jơlan Lê Duẩn, plơi prong Pleiku, phrâo brơi prăk hơmâo 1,5 klai đôč amăng mrô prăk hơmâo pơpha brơi lĕ 185 klai prăk, hơmâo 3,6%. Ăt ƀơi Pleiku mơn, Jơlan Nguyễn Văn Linh, phrâo brơi prăk pioh pơkra giwăm 27% amăng mrô 100 klai prăk amăng thun anai. Bơ jơlan pioh nao rai bơwih ƀong gah Ngŏ (jơlan bĕ jơlan mrô 19) - kơčăo bruă yôm phun mơ̆ng tơring čar, hăng mrô prăk tuh pơ alin 1200 klai, ăt kơnong hơmâo 3,6% đôč.

Wơ̆t 3 kơčăo bruă anai lêng kaih soh, yua dah phun tơhnal ñu lĕ aka ƀu giong bruă čuk pơkra lŏn pioh pơkra jơlan, aka ƀu jao kơ anom bruă pơkra jơlan. Ơi Phan Việt Tân - Kơ-iăng khua wai lăng bruă Ngă hmua, gah Khul wai lăng Tuh pơ alin man pơdong tơring čar Gia Lai brơi thâo, tui tơlơi phiăn tuh pơ alin bruă kơnuk kơna, bruă pơsit nua lŏn či mă yua lŏn pioh man pơkra kiăng ngă lu hră pơ-ar, anun yơh jing kaih hĭ:

“Ră anai ăt glăk tơguan hơmâo anih pơkra jơlan mơn. Lu anih (tơring glông Đăk Đoa hăng Pleiku) lêng kơ ngă giong laih bruă jŭ yap hơdôm tơlơi bơbeč mơ̆ng kơčăo bruă. Samơ̆ ră anai, glăk tơnap kơ bruă pơsit nua lŏn tong ten, anun khŏm tơguan anom bruă lăi glăi, pơsit brơi ƀơ̆i, kiăng Gơnong bruă Kông ngăn lŏn tơnah hăng Ayuh hyiăng pơsit brơi. Tơdơi kơ anom bruă man pơkra ngă giong, dưi brơi thim prăk dong. Samơ̆ truh ră anai ƀu dưi ngă tui hăng akŏ bruă ba tơbiă blung a ôh”.

Rơngiao kơ tơnap amăng bruă mă yua lŏn pioh čuk pơkra jơlan, bruă kơƀah lŏn pơbôr ngă jơlan ăt ngă ƀu ƀiă ôh kơčăo bruă ƀơi Gia Lai kaih hĭ. Sit biă ñu, ƀơi tơring čar Gia Lai hơmâo 4 kơnua lŏn pioh pơbôr đĭ hơmâo hră brơi mă yua hăng 5 luh boh pơtâo hơmâo brơi mă yua. Samơ̆ lu luh lŏn luh pơtâo anai ataih mơ̆ng anih pơkra jơlan, lơ̆m anun pơkra jơlan kiăng tuh lu lŏn biă. Amăng hơdôm blan rơgao, tơring čar Gia Lai brơi juă nua lŏn, pơsit, ngă hră brơi hơdôm boh luh anai bơwih brơi bruă pơkra jơlan, samơ̆ truh ră anai ăt aka ƀu ngă giong bruă ôh. Ơi Nguyễn Văn Quảng - pơ ala kơ anom bruă man pơkra Kông ti pơčruh ngăn man pơkra ring bruă 510, gơgrong ngă bruă man pơkra mrô 7, Jơlan pioh nao rai bơwih ƀong gah Ngŏ lăi nao hơdôm tơnap mơ̆ng anom bruă pơkra jơlan:

“Bruă mă mrô 7 hơmâo 3 boh tơdrông hăng 1,5 km jơlan. Truh ră anai glăk hơmâo pơkra 1 akŏ tơdrông M2 ƀơi Biển Hồ đôč. Amăng 1,7km jơlan, pô tuh pơ alin kơnong jao glăi 500m jơlan đôč, pô gơgrong tuh pơ alin ăt glăk pơphun ngă, samơ̆ aka ƀu hơmâo lŏn tuh ôh. Kiăng ngă tañ lĕ khŏm hơmâo lŏn pơbôr”.

Tơlơi ƀu gêh gal ƀơi Gia Lai lĕ wơ̆t kơčăo bruă djơ̆ hrơi pơkă hai ăt bưp lu tơlơi tơnap, gun găn mơn amăng bruă brơi prăk, yua dah tơring čar ƀu hơmâo prăk. anai jing tơlơi hơmâo sit nik ƀơi hơdôm kơčăo bruă mă prăk mơ̆ng prăk duh lŏn hăng prăk apah yua lŏn, lơ̆m thun 2022 truh ră anai, bruă sĭ mơdrô lŏn tơnah trun laih, tơring čar ƀu hơmâo dong tah prăk mơ̆ng bruă sĭ mơdrô lŏn. Ơi Trương Hải Long, Khua jơnum min mơnuih ƀôn sang tơring čar Gia Lai brơi thâo, hơdôm gơnong bruă, anom bruă amăng tơring čar glăk ječ ameč ĕp hơdră pơsir hĭ tơlơi tơnap.

“Gơnong bruă man pơphô hăng tuh pơ alin jing anom bruă wai lăng 3 grup ngă bruă ječ ameč lăi pơthâo kơ anom bruă dưi pơsir, kơ bruă kah pơpha prăk dŏ glăi kiăng ngă bruă; ngă giong hră pơ-ar tuh pơ alin, pơtrut tañ bruă mă yua lŏn, čuk pơkra jơlan hăng pơdong plơi phrâo. Gơnong bruă ngă hrŏm hăng ƀing gơgrong tuh pơ alin, gơnong bruă, pơƀut pơsir hĭ tơlơi tơnap amăng bruă rŭ pơdong pơđĭ kyar bơwih ƀong huă - mơnuih mơnam hăng 3 jơlan hơdră dêh čar pơtrun. Prăp lui djŏp tơlơi pơphô bruă kơ Jơnum min mơnuih ƀôn sang tơring čar pơphun jơnum pơsit glăi, pơsir brơi hơdôm tơlơi tơnap hlâo lơ 20/9/2023”.