Hăng tơlơi gir run dưm dăp, pơplih pơkra, mơng lơ 1/2/2026 truh ră anai, tơhan pôlih wai lăng Kông ang tơring čar Gia Lai hơmâo pơkiăo nao rơbêh 13.500 wŏt mơnuih apăn bruă, tơhan kông ang hyu tir, wai lăng. Mơng anun hơmâo ĕp ƀuh, pơsir hĭ rơbêh 100 čô mơnuih ngă soh, ruh hĭ hơdôm anih sĭ gơnam pơdong mă.

Tui Trung tá Nguyễn Ngọc Sơn, kơ-iăng Khua grup tơhan pôlih, anom bruă tơhan pôlih wai pơgang hơđong amăng mơnuih mơnam, kông ang tơring čar Gia Lai, hrŏm hăng bruă pơsir hĭ bruă ngă soh, bruă pơtô pơblang ăt hơmâo pơtrut kơtang hăng giăm 1.000 wŏt hyu pơtô pơblang ƀơi anăp amăng hơdôm boh plơi pla; rơbêh 10.400 boh sang anŏ sĭ mơdrô hơmâo kĭ tơlơi ƀuăn gum hrŏm wai pơgang hơđong amăng ƀon lan. Trung tá Nguyễn Ngọc Sơn brơi thâo, tơhan pôlih amra tŏ tui kơtưn pel ĕp, pơsir hĭ, pơhlôm brơi thun tuai čuă ngui dêh čar pơphun rơnuk rơnua.