Ngă tui bruă ngă anăn “Hơdră pơtrun Quang Trung” yua Khua dêh čar jak iâu ngă tui mơ̆ng lơ 1/12, djop sang bruă ling tơhan ƀơi tơring čar Gia Lai pơphun sa amăng plĕ, man pơdong glăi 100 boh sang brơi sang anŏ mơnuih ƀôn sang hơmâo sang dlưh răm abih yua ia kơthel hăng ling dăo ngă phrâo anai. Amăng hơdră ngă anai, khul tơhan Quân đoàn 34, man pơdong 70 boh sang, sang bruă khua tơhan blah ngă tơring čar Gia Lai tŭ mă man pơdong 30 boh sang dŏ glăi.

Lu khul ling tơhan ngă hrŏm tong ten hăng gong gai kơnuk kơna jŭ yap glăi abih djơ̆ anăn pô sang tŭ mă tơlơi djru, prăp lui gơnam mă bruă man pơdong sang, brơi mơnuih mă bruă, anih dŏ, mơnong ƀong huă hăng rơdêh đĭ kơ grup ling tơhan mă bruă man pơdong sang. Djop sang bruă gir run ngă giong, jao glăi sang kơ mơnuih ƀôn sang 100 boh sang phrâo anun hlâo kơ lơ 31/01/2026, djru mơnuih ƀôn sang hmao čơkă hrơi ngă yang thun phrâo djuai ania amăng sang phrâo, hơđong, rơnuk rơnua kơjăp phik.

Lơ 1/12, Khua Jơnum min mơnuih ƀôn sang tơrning čar Lâm Đồng ơi Hồ Văn Mười git gai jơnum mơ̆ng ataih hăng hơdôm boh tơring, kiăng ječ ameč man pơdong hăng pơkra glăi sang dŏ kơ hơdôm boh sang răm rai amăng tal hơjan ia dăo phrâo rơgao.

Tơring čar hơmâo 76 boh sang tơglưh abih, 749 boh sang răm rai, amăng anun dă D’Ran jing anih răm rai kơtang hloh hăng 46 boh sang răm rai, pơčah, 17 boh sang tơglưh hlao hăng 6 boh sang hơdip ter ia krông Đa Nhim khŏm đuăi ječ, jing anai lĕ hơdôm boh sang kiăng pơdong plơi phrâo. Tơring čar pơsit rơnoh djru 120 klăk hăng rim boh sang tơglưh hăng 20-40 hăng hơdôm boh sang kiăng pơkra glăi; laih dong kiăng hơdôm boh tơring krăo lăng kjăp bruă mă yua prăk djơ̆ glông, ječ ameč ĕp brơi lŏn dŏ kơ hơdôm boh sang aka ƀu hơmâo lŏn; pơhlom pơkra sang dŏ hlâo kơ Tê̆t ngă yang thun phrâo 2026.