Tom brơi (lơ 22/11), Anom bruă tơhan kông an wai lăng jơlan - Kông an tơring čar Gia Lai hơmâo ngă hrŏm hăng Sang măi pơkra sik An Khê pơphun Jơnum iâu pơthưr hăng kĭ hră ngă tui tơlơi phiăn kơ rơnuk rơnua hơđong kơjăp, pơhlôm rơnuk rơnua jơlan glông hăng Sang măi pơkra sik An Khê, mơnuih sĭ mơdrô pơdŭ pơgiăng gơnam bơyan tơbâo 2023-2024. 

Ƀơi mông kĭ pơkôl, gah sang măi pơkra sik An Khê, hơdôm anom bơwih ƀong, anom ngă ƀong hrŏm hơmâo kĭ hră ngă bruă kiăo tui tơlơi phiăn pơdŭ pơgiăng, yŏng glăm gơnam hăng rơdêh hăng mrô kơtrâ̆o gơnam tam; rơdêh nao rai khŏm pơhlôm djơ̆ hăng tơlơi pơkă. Ƀơi mông jơnum, pô mơgăt rơdêh Nguyễn Tấn Chung, să Nghĩa An, tơring glông Kbang brơi thâo, bơyan anai, Sang măi pơkra sik An Khê brơi hră blơi tơbâo lăp djơ̆, djru brơi bruă koh pơhrui tơbâo mơ̆ng neh met wa hơmâo pơhlôm klă. Mơ̆ng anun, huăi ngă rơbêh ƀudah kơƀah rơdêh pơgiăng, bruă pơgiăng pơƀut rơgao đơi.