Tui jŭ yap, rĭm čô kông ñơn arăng dŏ dong mơng 30 truh 50 klăk prăk. Ơi Lê Tấn Thanh, mơng să Dak Wer, tơring glông Dak R’Lấp, tơring čar Dak Nông brơi thâo: Amăng blan 10/2023, ñu ba nao giăm 70 čô kông ñơn mơng tơring čar: Dak Nông, Phú Yên, Bình Phước hăng hơdôm tơring čar kual Yŭ nao man pơkra drông war rông un. Truh ră anai hơmâo giăm 4 blan laih, anom bruă gơgrong iâu mơnuih mă bruă phrâo jao prăk apah glăk ha bơnah đôč. Ơi Thanh hơmâo lu wŏt nao ĕp samơ̆ kơnong hmư̆ hơdôm tơlơi ƀuăn mă hăng mơbah đôč.

“Ră anai kâo glăk rông ba adơi ayong hơdôm blan laih, dong mơng lơ 16/10/2023 truh ră anai, hơmâo mơn ha wŏt gah kông ti Vương Anh Thắng mă lui hlâo 600 klăk prăk, truh ră anai prăk apah brơi kông ñơn hăng yua gơnam apah giăm 3 klai 200 klăk prăk aka ƀu hơmâo ôh. Kâo ăt nao ĕp ƀing pô tuh pơ alin, samơ̆ ƀing gơñu kơnong ƀuăn mă hăng mơbah lơ 20/12 ƀing adơi ayong amra hơmâo prăk apah, hmư̆ ƀing gơñu ƀuăn na nao mơ̆ truh ră anai ăt aka ƀu ƀuh prăk lơi, kâo jing ƀu anăm rông ba adơi ayong kông ñơn lơi. Čang rơmang anom bruă bơdjơ̆ nao mă bruă hiưm pă kiăng ƀing gơñu dưi apah prăk adơi ayong glăi ƀong Tê̆t. Bơ bruă anai hlơi djơ̆ hlơi soh glăi tơdơi kơ Tê̆t amra pơsir, yua giăm tê̆t laih, adơi ayong kông ñơn kiăng glăi pơ plơi pla bong tê̆t mơn”.

Kar kăi tui anun, ayong Trần Minh Hướng (mơng Tây Ninh) ăt jak iâu ƀing adơi ayong mơng plơi pla nao man pơkra drông rông un. Rơbêh 3 blan anai, ayong Hướng kah hăng ƀing adơi ayong arăng glăk dŏ dong prăk apah giăm 500 klăk prăk.

“Rai mă bruă ƀơi anai giăm 3 blan laih, blung hlâo lĕ hơdôm hơpluh truh pơ dua hơpluh čô, ră anai dŏ kơnong 8 čô đôč, ƀu hơmâo prăk, ƀu thâo ngă hiưm pă kiăng kơ ĕp prăk brơi adơi ayong glăi pơ plơi pla. Ƀing gơmơi mă bruă djru tui tlôn prăk apah lĕ 12 klăk prăk, ƀing thâo man pơkra 15 klăk prăk, čang rơmang hơmâo prăk kiăng adơi ayong glăi pơ plơi pla mơ̆ ră anai ăt aka ƀu thâo ngă hiưm pă lơi”.

Ơi Hồ Công Anh Tuấn, dŏ amăng tơring glông Chư Sê, tơring čar Gia Lai, tŭ ư man pơkra 6 boh drông rông un ƀơi anai ăt glăk bơngŏt kar kăi mơn.

“Tlâo blan laih aka ƀu hơmâo prăk apah brơi adơi ayong kông ñơn. Anai lĕ mơng ƀing tuh pơ alin hăng hơdôm anom bruă man pơkra, tong ten hiưm pă ñu kâo ăt aka ƀu thâo lơi. Samơ̆ ră anai tơña Vương Anh Thắng (anom bruă man pơkra) ƀing gơñu ăt jăm ƀuah anom bruă man pơkra lĕ mơnuih tuh pơ alin aka ƀu jao prăk apah. Mơ̆ kâo pô ăt kĭ pơkôl hăng Vương Anh Thắng đôč, ăt ƀu thâo hlơi pô tuh pơ alin man pơkra. Čang rơmang hơmâo hơdră pơsir hĭ tañ hloh, kiăng apah prăk brơi kông ñơn mơng ataih, ƀing gơñu rai mă bruă ƀơi anai 3 blan laih, pơ sang ƀing gơñu dŏ ană bơnai dong, bơ ră anai ƀu hơmâo prăk apah, giăm tê̆t ƀu hơmâo prăk đĭ rơdêh glăi pơ plơi pla ăt pap mơn”.

Akŏ bruă man pơkra drông rông un tuh hrôh ƀơi plơi Cây Xoài (să ia H’la, tơring glông Chư Pưh, Gia Lai) man pơkra dong mơng blan 1/2023, yua kông ti TNHH sa ding kơna Phát Tài Gia Lai tuh pơ alin. Hăng abih tih prăk tuh pơ alin giăm 80 klai prăk, kông ti TNHH Vương Anh Thắng lĕ man pơkra.

Bruă apah prăk kaih brơi ƀing kông ñơn mă bruă ƀơi anai, brơi ƀuh kông ti TNHH sa ding kơna Phát Tài Gia Lai hăng anom bruă man pơkra, Kông ti TNHH Vương Anh Thắng hơmâo lu tơlơi gun bơdjơ̆ nao bruă ngă soh hăng hơdôm tơlơi pơkă tui hră kĭ pơkôl mơ̆ hơdôm bơnah kĭ hlâo anun.

Yua aka ƀu hơmâo tơlơi tŭ ư hrŏm amăng bruă mă, yua anun aka ƀu hơmâo tơlơi tŭ ư kơ hơdôm bruă amra ngă, yua anun sang bruă prăk aka ƀu jao trun prăk ngă ƀing kông ñơn aka ƀu hơmâo prăk apah.

Ơi Rahlan Hoen, Khhua Jơnum min mơnuih ƀôn sang să Ia H’la brơi thâo, Jơnum min mơnuih ƀôn sang să phrâo thâo kơ bruă hơdôm hơpluh čô kông ñơn arăng aka ƀu apah prăk. Blung hlâo, Jơnum min mơnuih ƀôn sang să hơmâo pơkiăo nao kông ang pel ĕp sit nik kiăng pơhlôm hơđong. Laih dong amra hiăp bit hăng ƀing mơnuih bơdjơ̆ nao kiăng pơsir hĭ gun găn brơi mơnuih ƀôn sang. Tơdơi anun amra lăi pơthâo Jơnum min mơnuih ƀôn sang tơring glông Chư Pưh hăng anom bruă bơdjơ̆ nao kiăng pơsir hĭ./.