Ƀơi hơdôm boh sang sĭ gơnam man pơdong sang dŏ ƀơi să Phù Cát, hơdôm hrơi tơdơi kơ kơthel tal 13, mơnuih nao blơi lu hloh, biă ñu lĕ tuai nao blơi ƀrik hăng tôl. Ơi Nguyễn Văn Cát, dŏ ƀơi plơi Phú Kim, să Phù Cát phrâo blơi rơbêh ha rơtuh boh ƀrik klup pơbung sang. Ơi Cát lăi, tơlơi yom hloh mông anai lĕ gơnam hơmâo djŏp brơi neh met wa tañ pơkra glăi sang dŏ prăp lui amăng bơyan hơjan pơ anăp dong:“Kâo lăng nua huăi pơmă đơi lơi, tui hăng hơđăp mơn. anŏ yom lĕ sang mơdrô gơñu hơmâo lui laih gơnam, neh met wa kiăng lĕ hơmâo mơtăm či klup pơbung, huăi glêh tơguan ôh”.

Ƀơi hơdôm boh sang mơdrô, hră tĕp nua hơmâo pơƀuh ƀơi anăp sang mơtăm, brơi neh met wa krăp hăng hăng pơhmu hăng. Lu sang mơdrô brơi thâo, tơdơi kơ kơthel yơh mông ƀing ta kiăng gum djru kah pơpha tơlơi tơnap, khut khăt ƀu dưi pơđĭ nua gơnam ôh. Amai Nguyễn Thị Thu Thủy, pô sang mơdrô Sơn Quân, plơi Phú Kim lăi:“Nua mơ̆ng hlâo truh ră anai dŏ hơnong đôč, tap năng sa boh sang hơdôm rơbâo tơlŏ ƀrik ăt nua anun mơn, bơ ră anai mơnuih ƀôn sang kơƀah hơdôm tơlŏ ƀrik đôč gơñu rai blơi ăt sĭ nua anun mơn, ƀơi anŏ ñu gơñu blơi aset đơi lĕ gơmơi brơi đôč, ƀu mă prăk ôh”.

Ơi Nguyễn Ngọc Minh, pô sang mơdrô gơnam man pơdong Hồng, phường Quy Nhơn Nam brơi thâo, lơ̆m amăng plang internet ƀuh lu tơlơi pơhing lăi ƀrik hăng tôl kơƀah biă, nua pơmă dua wơ̆t, klâo wơ̆t, jing ƀơi Gia Lai kơđai glăi dong. Hơdôm boh sang mơdrô ƀơi anai ăt hơmâo mơn gơnam man pơkra lu biă, djă pioh hlâo kơ hrơi kơthel pưh nao:“Ăt sĭ hăng nua tui hơđăp mơn, huăi sĭ pơmă tui ôh, tôl hăng drông pơsơi, 2 mơta gơnam anun yơh nua đĭ trun, bơ ta dŏ mơn gơnam hơđăp lĕ ăt sĭ nua tui hơđăp mơn, ƀu hơmâo pơđĭ nua ôh”.

Kiăng huăi hơmâo bruă blơi djă lui gơnam giong anun sĭ pơmă, ƀing wai lăng anih sĭ mơdrô tơring čar Gia Lai hơmâo lăng glăi hăng brơi giăm 400 boh sang sĭ mơdrô gơnam man pơdong kĭ hră hơđong nua, ƀu dưi mơneč mă mông hơmâo kơthel mơ̆ sĭ pơmă; laih dong pơtruh nao rai sem lăng kiăng pơhlôm gơnam hơmâo ba sĭ hruaih. Ayong Lê Đình Tân, Pô wai lăng amăng Grup wai lăng anih sĭ mơdrô mrô 4, Anom wai lăng anih sĭ mơdrô tơring čar Gia Lai pôr pơthâo:“Hơdôm boh kông ti ƀuăn hăng anom apăn bruă lĕ sĭ nua tui hơđăp mơn hăng neh met wa, ƀing apăn bruă wai lăng anih sĭ mơdrô hăng kông an ngă hrŏm pơtô brơi sang mơdrô djru ba neh met wa, blơi sĭ hiư̆m pă brơi djơ̆, đah mơ̆ng găn rơgao hrơi blan glăk hơmâo tơlơi truh lŏn adai ngă”.

Bruă hơdôm boh sang mơdrô anet prong ƀơi Gia Lai djă hơnong nua gơnam, hrŏm hăng tơlơi pel ĕp sem lăng hmao kru mơ̆ng ƀing apăn bruă, djru brơi mơnuih ƀôn sang tañ pơkra glăi sang dŏ, hơđong tơlơi hơdip tơdơi kơ kơthel tal 13./.