Năng ai ha blan hăng anai, sit truh mlam, jua song nan, ƀattô anet pơgiăng măi ƀôp, hrip mă čuah amăng atur ia krông, ik ăk ba mơtam amăng dơnao sang măi drai apui lơtrik Ia Ly. Lu măi mok tuah, hrip, pơgiăng đĭ amăng rơdêh ba đuăi ƀu pơdơi ôh, lăng kah hăng anih dŏ mă bruă man pơdong dik dăk lu mơnuih. Lu hrơi kiăo tui lăng sŭ, ƀuh rim mlam hơmâo rơbêh 10 boh ƀattô anet prong pơdŭ pơgiăng đuăi čuah mơ̆ng tơdrun ñu, ba nao pơ anih pơtum ƀut ƀơi hang. Hơmâo ƀattô rơkĭ hlong hrip mă čuah, pơbuă amăng wong rơdêh prong laih buă giong, hlong pơgiăng đuăi pơ anih pơkŏn ba sĭ mơdrô. Sa čô mơnuih ƀôn sang dŏ giăm dơnao sang măi drai apui lơtrik Ia Ly, gơmơi ƀu lăi anăn ôh, brơi thâo:

“Anih mă čuah anai sui laih, ră anai mlam đôč arăng nao hrip mă čuah, tơhrơi lĕ ƀu mă bruă ôh, arăng brơi khul ƀattô dŏ jưh gah adih hang. Giong gơñu hrip mă čuah laih anun pruih nao ƀơi rơdêh buă wông pơgiăng đuăi hlao ƀu hơmâo anih dŏ ƀudah ngă tơdrun hơđong ôh, sa boh rơkĭ hrip mă čuah, ƀôp đĭ buă sa boh rơdêh kah hăng arăng găo hlang krep ba mơtam, giong anun đuăi ƀhiao, na nao tui anun rim mlam”.

Ơi Lê Xuân Dũng, Khua anom bruă wai lăng kông ngăn lŏn glai hăng ayuh hyiăng tơring glông Čư̆ Pah, ră anai amăng tơring glông hơmâo 10 boh anih, 10 boh sang bruă sĭ mơdrô, kông ty hơmâo hră dưi hyu mă kông ngăn lŏn tơnah, amăng anun hơmâo 4 boh sang bruă dưi hơmâo hră mă čuah ƀơi să Hà Tây, Ia Khươl, In Nhin hăng Ia Ka. Mơ̆ng akŏ thun 2023, Jơnum min mơnuih ƀôn sang tơring glông Čư̆ Pah hơmâo akŏ pơjing sa grup khua mua hyu mă bruă pel ĕp, pơsit tơlơi pơhing kơ arăng hyu mă čuah tă tăn. Khă tui anun, ƀơi hơdôm anih djơ̆ mông arăng hyu ĕp lăng ƀu ƀuh ôh bruă ngă soh glăi.

“Hyu mă čuah amăng atur ia krông sang măi drai apui lơtrik Ia Ly truh ră anai, aka ƀu hơmâo sang bruă pơpă ôh dưi hơmâo hră hyu mă čuah tui tơlơi phiăn pơkă. Khua mua tơring glông, kông an, anom bruă wai lăng kông ngăn lŏn glai hăng ayuh hyiăng hyu sem lăng na nao amăng anih giăm dơnao sang măi drai apui lơtrik samơ̆ aka ƀu ƀuh ôh. Kual amăng dơnao anun prong đơi, anih jĕ giăm guai tơring čar Gia Lai hăng Kon Tum anun tơnap biă mă ƀuh ƀing arăng dŏp mă čuah, sit hyu ĕp hlâo ƀing ñu thâo hăng đuăi kơdŏp hĭ, kiăng hơmâo mă ƀing tuah mă čuah tơnap tap biă mă, gơñu juăt hyu mă čuah amăng mơmŏt mlam, rơngiao kơ mông mă bruă sit nik”.

Tui hăng hră lăi pơthâo mơ̆ng jơnum min mơnuih ƀôn sang tơring glông Čư̆ Pah, ră anai, amăng kual giăm dơnao sang măi drai apui lơtrik Ia Ly hơmâo 4 boh sang bruă hơmâo hră pơar dưi mă čuah djơ̆ tơlơi phiăn. Mah aka ƀu sĭ mơdrô, pơdŭ pơgiăng đuăi ôh, samơ̆ bruă arăng hyu mă dŏp čuah, pơdŭ pơgiăng đuăi sui thun blan hăng anai laih. Nay Kiên, Khua jơnum min mơnuih ƀôn sang tơring glông Čư̆ Pah brơi thâo, bruă arăng hyu mă čuah, pơdŭ pơgiăng đuăi ča čot juăt ngă amăng mơmŏt mlam anun tơnap biă mă kơ tơhan anom bruă kơnuk kơna nao pơgăn.

"Bruă mă hơmâo sui hăng anai sa blan, hăng hơdôm sang bruă hơmâo hră dưi mă bruă lĕ, jing hră mơ̆ng Ding jum tuh tia pơkra ming hăng sĭ mơdrô ngă brơi, tŭ ư dưi mă čuah amăng atur ia krông. Samơ̆ tơlơi pơkă lĕ hơdôm anom bruă anai dưi mă čuah samơ̆ ƀu dưi pơgiăng hyu ôh. Bơ amăng mơmŏt mlam ƀudah amăng mông tơhan kơnuk kơna ƀu mă bruă anun ƀu thâo ƀuh ôh ƀing gơñu pơdŭ pơgiăng đuăi čuah. Pơ anăp anai, ƀing gơmơi amra akŏ pơjing 4 grup djop sang bruă kơnuk kơna pơlir hơbit, pel ĕp ƀơi 4 boh sang bruă hơmâo hră găl tơlơi phiăn anun. Ha bơnah ăt yua tơlơi glăm ba mơ̆ng khua mua tơring glông gơmơi amra pơsir khut khăt, črăn pơpă yua kơ tơring čar dưi pơsir lĕ, gơmơi rơkâo đĭ hăng tơring čar pô pơsir laih anun lăi pơthâo hăng tơring čar Kon Tum ngă hrŏm pơsir djơ̆ tơlơi phiăn”.

Hơmâo lu rơdêh pơdŭ pơgiăng čuah ƀu djơ̆ tơlơi phiăn, ba pơđuăi mơ̆ng sang măi drai apui lơtrik Ia Ly dik dăk. Bruă ngă ƀu tong ten, kơƀah tơlơi glăm ba mơ̆ng sang bruă hơmâo tơlơi dưi ƀơi anai ngă rơngiă hĭ ƀu ƀiă ôh kông ngăn lŏn tơnah čuah mơnai ia krông, sit mơ̆n či ba truh lu tơlơi sat răm pơkŏn hăng rơngiă tơlơi rơnuk rơnua amăng kual.

Hơdôm rơtuh met khô̆i čuah arăng dop mă pơdŭ đuăi, ba hyu sĭ mơdrô rim hrơi, ƀu kơnong ngă hrŏ kông ngăn amăng lŏn tơnah đôč ôh, dŏ bơbeč djơ̆ anŏ pơhrui glăi mơ̆ng tơring glông, plơi pla. Ơi Đoàn Tiến Cường-Khua kông ty apui lơtrik Ia Ly gah Group Apui lơtrik Việt Nam brơi thâo, bruă mă pơdŭ đuăi čuah ča čot hơmâo na nao đôč amăng kual giăm dơnao ia krông sang măi drai apui lơtrik, ngă rơngiă tơlơi rơnuk rơnua hơđong pơgang bơnư̆ pơkong ia dơnao prong. Thun blan rơgao, anom bruă ăt đĭ kanô hyu tir na nao mơ̆n, kiăng pơgang hơđong amăng kual dơnao sang măi drai apui lơtrik wai lăng. Kơnong amăng anih ataih 300 met pơkă mơ̆ng bơnư̆, ƀing mă bruă amăng sang măi hyu tir, pơkiăo đuăi ƀing hyu mă čuah, wah akan amăng anih hŭi rơhyưt. Rơngiao kơ anih hyu tir anun, yua kơ anom bruă kơnuk kơna amăng tơring glông Čư Pah pô wai lăng, anun lĕ anom bruă wai lăng kông ngăn hăng ayuh hyiăng, anom bruă tơhan pơlih pơgang kông ngăn ayuh hyiăng pô pơgang. Mah bruă arăng hyu dŏp mă čuah tă tăn aka ngă bơbeč sat kơ ring bruă bơnư̆ sang măi drai apui lơtrik Ia Ly ôh samơ̆ tơlơi anai kiăng pơsir khut khăt, tañ pơđut hĭ bruă hyu mă čuah, đah mơ̆ng pơgang kông ngăn lŏn glai, adai rơhuông, anih anom hiam amăng ter hang ia dơnao sang măi drai apui lơtrik laih anun pơgang hơđong anih dŏ jum dar ƀơi bơnư̆ pơkong ia prong anun.