Tui tơlơi lăi pơthâo glăi amăng mông jơnum, mrô mơnuih djai yua kơ klin ruă djơ̆ tuai mơ̆ng đơ đam dêh čar ta mơ̆ng akô̆ thun truh ră anai lĕ 64 čô mơnuih, hmâo ƀơi hơdôm anih anom phun kah hăng Gia Lai, Nghệ An, Điện Biên, Bình Phước. Amăng anun, Gia Lai hmâo 11 čô mơnuih, jing anih anom hmâo mrô mơnuih djai yua kơ ruă djơ̆ tuai lu hloh đơ đam dêh čar, ăt na nao mơn dŏng amăng top phun gah tơlơi ruă anai hơdôm thun rơgao.

Amăng mông jơnum, ƀing khua pơ ala bơkơtuai kơ bôh nik tơlơi ruă anai ƀơi mơnuih Việt Nam hăng amăng kual Dap Kơdư, tơnap tap tơlơi lông hăng hơdôm jơlan pơsir; črông sai hơdôm bruă wai lăng hăng kơtưn klâ̆o vaccine kơ asâu; hơdôm bruă pơgang pơgăn tơlơi ruă anai gah ană mơnuih; bruă mă hăng bruă gơgrong mơng gong gai hăng gơnong bruă bơdjơ̆ nao ƀơi tơring čar... Tui tơlơi pơtă mơ̆ng ƀing juăt bruă amăng mông jơnum, ră anai tơlơi ruă djơ̆ tuai ăt akă hmâo pơjrao sit mơn. Hơdră pơgang hlôm hlâo ba glăi bôh tơhnal hloh lĕ tlâ̆o jrao pơgang djơ̆ tuai kơ hlô hăng pơgang hlôm hlâo kơ mơnuih djơ̆ asâu, eo djơ̆ tuai kĕ; tŭ yua hloh lĕ klâ̆o pơgang hlôm hlâo 24 mông tơdơi kơ asâu, eo kĕ./.