Amăng hơdôm hrơi hơjan prong, ƀơi čư̆ Một, phường Quy Nhơn, tơring čar Gia Lai juăt hŭi biă tơlơi truh tơhlŏm lŏn, dlưh kriang čư̆. Ƀơi kriang čư̆, lu sang anŏ pơdong ƀơi anun lăng rơhyưt biă. Gah yŭ tơkai čư̆, hơmâo ơdôm boh sang, lŏn, pơtâo tơhlŏm trun dor klŏm lui mơtăm, lu sang anŏ đuăi nao dŏ pơ pơkŏn.

Yă Phạm Thị Thùy, Khua ƀut plơi 19, phường Quy Nhơn brơi thâo, lu sang anŏ dŏ amăng kual anai yua ană plơi hlong či čong jah glai, pơdong mă sang, blơi sĭ nao rai lu wơ̆t laih. Thun 2025, lơ̆m dlưh kriang čư̆ kơtang, hơmâo laih 9 boh sang anŏ đuăi hĭ, ră anai dŏ glăi 27 boh sang anŏ ăt dŏ hơdip pơ anai mơn. Bruă ƀu hơmâo hră pơ-ar lŏn sang đang hmua, anun yơh tơnap mơn či djru, ĕp brơi anih dŏ phrâo kơ mơnuih ƀôn sang tơnap tap: “Tơlơi pơtrun mơ̆ng tơring čar kơ bruă ba pơđuăi mơnuih ƀôn sang pơ anai jing abih bang tŭ ư soh. Samơ̆ hơmâo mơn đa ƀu gưt ôh, yua dah lŏn sang đang hmua arăng čong jah ngă mă pô, laih anun gơñu kiăng djru brơi lŏn. Lơ̆m anun, tơring čar djru ba ƀiă đôč, yua dah ƀing ñu ƀu hơmâo hră yua lŏn ôh, anun yơh kơnong djru ba ƀiă đôč, čom či man pơdong sang ƀudah hyu ĕp brơi anih rơnuk rơnua hloh, ƀu brơi dŏ dong tah pơ anih lŏn tơhlŏm”.

Plơi pla ƀơi čư̆ Một hơmâo pơdong rơbêh kơ 20 thun laih. Ƀơi anăp tơlơi truh tơhlŏm kriang, gong gai glăk ječ ameč ngă hrŏm hăng Gơnong bruă man pơdong, Gơnong bruă ngă hmua hăng ayuh hyiăng Gia Lai lăng glăi abih bang, ba tơbiă hơdră ba pơđuăi sang anŏ amăng anih hŭi rơhyưt, laih dong sem lăng pơkra ming hiưm thâo hăng kual anai.

Ơi Nguyễn Đức Toàn, Khua jơnum min mơnuih ƀôn sang phường Quy Nhơn, brơi thâo: “Ră anai tơring čar git gai ječ ameč hơdôm gơnong bruă hăng Jơnum min mơnuih ƀôn sang phường Quy Nhơn sem lăng, pơthâo brơi hơdră ba pơđuăi mơnuih ƀôn sang amăng kual anai. Lơ̆m hơjan kơthel truh, phường amra ba pơđuăi abih bang hơdôm boh sang anŏ amăng anih hŭi rơhyưt, nao dŏ pơ anih hơđong hloh”.

Bruă ba pơđuăi ană plơi mơ̆ng anih tơhlŏm ƀơi čư̆ Một ƀu kơnong bruă ječ ameč pơgang ba tơlơi hơdip, dram gơnam đôč ôh, ăt kiăng hơmâo hơdră djru, hăng ĕp brơi anih dŏ phrâo lăp djơ̆, pơhlom brơi tơlơi hơdip mơda hơđong kơ mơnuih ƀôn sang. Kiăng hơđong anih hơdip, gong gai hăng hơdôm anom bruă kơnuk kơna kiăng ječ ameč djru pơklaih anŏ tơnap, ngă tañ bruă ba pơđuăi ană plơi, pơdong plơi phrâo, djru ană plơi hơđong tơlơi hơdip mơda./.