VOV4.Jarai - Tơdơi kơ 3 blan pơphun ngă, hlăk ai djru mơnuih ƀon sang bơyan pơdơi prong 2022 ƀơi Gia Lai pơđut laih, hăng lu bruă ngă yôm, lăp hơdor, abih pran jua yua kơ mơnuih ƀon sang mơng ƀing hlăk ai tơdăm dra. Bruă hlăk ai djru bơyan pơdơi prong tơring čar Gia Lai hơmâo pơphun mơng akŏ blan 6, hăng lu bruă mă amăng 3 blan mơtăm kah hăng: “Pơtô brơi - Djru čơđai pơplông”, “Hrơi pơdơi ƀhêm”, “Bơnga ting mriah”, “Hyu ngă bruă mơtah”, “Bơyan pơdơi prong mơtah”. Hơdôm bruă ngă rơđah rơđông hơmâo pơƀut ngă ƀơi hơdôm boh să ƀơi guai dêh čar; hơdôm boh să, plơi pla gir ngă giong jơlan hơdră man pơdong plơi pla phrâo thun 2022 hăng anih dŏ hơdip, mă bruă, hrăm hră mơng ƀing hlăk ai, čơđai sang hră.

Ƀing hlăk ai djru bruă khăm hăng brơi ia jrao kơ mơnuih ƀun rin

Ngă bruă amăng bơyan pơdơi sang hră, hlăk ai Gia Lai hơmâo ngă lu bruă yôm kah hăng pơkra ming hăng man pơkra phrâo 27 km jơlan nao rai amăng plơi; lăng brơi tơlơi suaih pral, brơi ia jrao kơ 1400 wơ̆t čô mơnuih ƀun rin; pla phrâo giăm 170 rơbâo phun pla; man pơkra brơi 6 boh sang khăp pap; pơphun pơtŏp bruă tơgŭ bơwih ƀong, jao glăi boh thâo ia rơgơi phrâo kơ hơdôm rơbâo wơ̆t čô hlăk ai amăng plơi pla...

Siu H’Mai: Pơblang