Tui hăng akŏ bruă Jơnum min mơnuih ƀôn sang tơring čar Gia Lai dăp hơdră amra khut khăt brơi ruh abih ring bruă, anŏ arăng kơsing nao pơ hang ia krông, jơlan glông nao rai, ngă gun hĭ hnoh ia krông či rô, khom pơsir djơ̆ lăp plah wah ring bruă man pơdong bruă čar hăng ring bruă bơwih brơi kơ mơnuih ƀôn sang kiăng hnoh ia krông rô rơhaih rơhong huăi hơmâo anŏ ngă gun, hnun kah plai ƀiă ia lip prong hăng kơtang ƀơi bah krông Hà Thanh.

Amăng thun 2026, tơring čar đing nao djru 280 klai prăk brơi pơsir bruă ngă ječ ameč hloh, pơsir hĭ anŏ ngă gun hnoh ia krông rô hluai amăng bơyan hơjan hlim. Bruă phun đing nao anun lĕ khom ruh pơđuăi hĭ 75 boh sang anŏ mơnuih ƀôn sang man pơdong, ngă soh glăi ƀơi akŏ tli hang ia krông să Tuy Phước hăng Phường Quy Nhơn Bắc. Mơ̆ng thun 2027-2030, tơring čar  amra mă yua dơ̆ng 2.395 klai pioh ngă pơgiong tơhnal pơkă man pơkra ring bruă gah tơkai ia krông. Jơnum min mơnuih ƀôn sang tơring čar, jao kơ Gơnong bruă Ngă hmua hăng Pơgang ayuh hyiăng anih dŏ jum dar pô git gai, ngă hrŏm djop gơnong bruă tơring čar, kiăng giong akŏ bruă tum teč khom lăi pơthâo hlâo kơ lơ 06/03/2026, pioh sem glăi pơsit brơi pok pơhai ngă tui  mơtam.