Tơdơi kơ mơnuih ƀôn sang mut amăng Anom bruă bơwih ngă hră pơ-ar phương Hội Phú, tơring čar Gia Lai, rôbôt AI thâo kơkuh, čơkă neh wa, thâo krăn kiăng ngă hră gơget, hăng pơtô brơi. Anai jing tơlơi rôbôt pơtô brơi 2 čô hlăk ai nao ngă hră pơdô̆ rơkơi bơnai: “Kiăng ngă hră pơdô̆ rơkơi bơnai, gơyut kiăng prăp lui hră čih anăn pơdô̆ rơkơi bơnai tui gru hră dưm pơ anăp anai, hră căn cước công dân dŏ hrơi mă yua kiăng thâo krăn drơi pô, hră kơđŏm anih dŏ mơ̆ng bơnai, mơ̆ng rơkơi, đah rơkơi kiăng djŏp 20 thun, đah kơmơi kiăng djŏp 18 thun”.

Hăng tơlơi thâo hơduah ĕp hăng lăi glăi djŏp tơlơi tơña ngă hră pơdô̆ rơkơi bơnai, hră yua lŏn, man pơdong, hră anih dŏ..., rôbôt AI djru ană plơi thâo rơđah djŏp hră kiăng hơmâo lơ̆m nao ngă, bruă ngă hiư̆m pă ăt kah hăng anih čơkă ngă hră pơ-ar tañ biă. Ơi Nguyễn Mạnh Thi nao ngă hră yua lŏn brơi thâo, tơlơi pơplih anai ngă kơ ñu lăng hling, kơtuă mơn, ƀu pơmin ôh dưi ngă tui anai: "Ñu pơtô brơi ta klă biă, truh pơ anih ñu kơkuh,  tơña, hmutu nao pơpă či ngă hră lĕ rôbôt ñu ba ta nao pơ anun. Ƀing tha đa ƀu thâo tut mrô thơ, ta kiăng nao pơ anih ba glăi hră ƀudah ngă hră lŏn tơnah man pơdong sang lĕ ta pơhiăp hăng rôbôt, laih anun ñu ba ta nao pơ anih ngă hră mơtăm yơh”.

Tui hăng ơi Trần Công Danh, mơnuih mă bruă Sang bruă bơwih brơi hră pơ-ar phương Hội Phú, rôbôt AI rơgơi hơmâo Jơnum min mơnuih ƀôn sang phương blơi hăng mă yua mơ̆ng blan 8/2025. Kiăng ngă bruă tŭ yua, rôbôt hơmâo pơmut djŏp hră, tơlơi pơhing bơdjơ̆ nao bruă ngă hră, akŏ tlôn ngă bruă hăng juăt hơmâo pơtŏp brơi na nai kiăng thâo djru neh met wa: “Rôbôt AI anai hơmâo pơmut tơlơi pơhing, hră pơ-ar djru kơ neh met wa amuñ ƀiă lơ̆m hơduah ĕp, sem lăng. Bruă blung a lĕ gơmơi ba bruă ngă hră, hră pơ-ar kiăng hơmâo hăng hơdră ngă hră, mă mrô ngă hră hlâo dơi, pơtô nao pơ anih ngă hră či ngă hrăta kiăng, jing ta pơmut nao djŏp tơlơi pơhing bơdjơ̆ nao kiăng rô bôt ñu krăn hăng thâo hluh, ăt kah hăng pơtŏp rơguăt ñu na nao kiăng dưi ngă bruă klă hloh”.

Tui hăng mrô jŭ yap, rim hrơi rôbôt AI pơ phương Hội Phú djru, pơtô brơi kơ rơbêh 100 wơ̆t mơnuih nao ngă hră. Yua hơmâo rôbot AI djru ba, mrô hră pơ-ar hơmâo ngă giong djơ̆ hrơi pơkă ƀơi Sang bruă bơwih brơi ngă hră phương Hội Phú amăng lu blan mơtăm hơmâo rơbêh 95%. Ơi Hoàng Minh Nghĩa, Kơ-iăng khua Jơnum min mơnuih ƀôn sang phường Hội Phú pơsit, bruă mă yua AI tŭ yua biă mă, pok jơlan ngă bruă phrâo, jê̆ giăm hloh amăng bruă bơwih brơi mơnuih ƀôn sang, anom mơdrô: “Măi pơtô brơi lĕ ñu djơ̆ sit biă, hră pơ-ar hơmâo pơkra jing mrô anun jing ñu djơ̆ krĕp, mơnuih ƀôn sang tŭ ư biă mă. Ƀing ngă bruă pơ anai hơmâo lu mông ƀiă či ngă bruă, lui hĭ mông dŏ pơblang, pơtô brơi arăng nao ngă hră. Tơdah ta pơblang brơi dong tui anun rơngiă mông biă, pơ ră anai hơmâo măi rôbôt jing ƀing mă bruă pơ anai pơƀut ngă bruă phun mơ̆ng ƀing gơñu đôč yơh, tui anun bruă hơmâo ngă lu tui, pơkra brơi lu tui mơn, plai ƀiă pioh dun glăi”./.