Mơguah lơ 4/11, Ping gah tơring čar Gia Lai pơphun Jơnum klah čun 5 thun ngă tui Jơlan hơdră pơđĭ kyar gơnong bruă tuai čuă ngui amăng tơring čar. Jơnum hơmâo ba tơbiă hơnong pơkă truh thun 2025, Gia Lai čơkă 2 klăk 100 rơbâo tuai čuă ngui, pơhrui dưm dưm 1.400 klai prăk. 5 thun laih rơgao, rơnoh pơđĭ kyar bơwih brơi tuai čuă ngui ƀơi Gia Lai pơplih tong ten, pơhrui hăng mrô tuai nao čuă ngui hơđong amăng rĭm thun. Rơwang thun 2017-2021, abih tih rơnoh prăk tuh pơ alin man pơdong anih anom, jơlan glông rơbêh 245 klai prăk, đing nao hơdôm anih čuă ngui phun amra dưi mă yua klă hloh.

Rơwang thun 2022-2025, Gia Lai anăp nao pơđĭ kyar bruă bơwih brơi tuai čuă ngui hơđong hluai tui bruă pơđĭ kyar gơnam yôm, mă yua anŏ gal kiăng pơhưč tuai čuă ngui ƀơi Gia Lai anun lĕ: Anih čuă ngui Biển Hồ - Čư̆ Đang Ya, anih čuă ngui drai ia Phú Cường, anih čuă ngui ƀơi đang glai dêh čar Kon Ka Kinh kual wai pơgang glai rưng Kon Chư Răng, dơnao ia Ayun Hạ, drai ia apui lơtrik Sê San 4 - Thác Mơ. Pơjing hơdôm hơbô̆ bruă bơwih brơi tuai čuă ngui amăng plơi pla ala ƀon.