Ƀơi plơi ia rơsĭ Quy Nhơn, anih pơphun tơlơi jơnum ngui Thun čuă ngui Dêh čar - Gia Lai 2026, hơdôm sang đih pơdơi, sang jưh tuai hơmâo lăng glăi abih laih măi mok pơhlom pơgang apui ƀong. Ƀơi Anya Premier Hotel Quy Nhơn, sang jưh tuai sem lăng laih măi pơthâo lơ̆m apui ƀong, măi pơčrâo brơi, anih tơbiă đuăi lơ̆m hơmâo tơlơi truh ăt kah hăng măi mok prah apui ƀơi anih; ngă hrŏm hăng Tơhan pơgang prah apui ƀong prăp rơmet hơdră pơgang lơ̆m hơmâo tơlơi truh ječ.

Thượng tá Đậu Văn Huy - Kơ-iăng khua Anom bruă tơhan pơgang, prah apui ƀong - djru mơnuih bưp tơlơi truh Kông an tơring čar Gia Lai lăi, bruă wai lăng kjăp pơgang apui ƀong ƀu kơnong bruă hơjăn mơ̆ng tơhan kông an đôč ôh, ăt jing bruă kiăng ngă mơ̆ng hơdôm anih anom, rim čô mơnuih mă bruă, đah mơ̆ng akŏ pơjing Gia Lai jing anih čuă ngui rơnuk rơnua, thâo čơkă tuai. Amăng rơwang hrơi tơjuh pơphun Thun čuă ngui Dêh čar thun 2026 ƀơi Gia Lai, tơring čar him lăng čơkă năng ai 70 rơbâo wơt tuai, anun bruă pơhlom rơnuk rơnua jing bruă prong biă. Tơlơi prăp rơmet hlâo tañ, mơ̆ng ataih, hăng dưm kơnar, amra djru ƀing tuai hơđong pran jua lơ̆m nao ngui pơ Gia Lai.