Ƀơi mông jơnum ĕp sang bruă mơdrô tuh pơ alin bơwih ƀong huă thun 2026, tơring čar Gia Lai hơmâo jao hră pơsit tuh pơ alin hăng hră pơƀuăn hơdor pioh kơ abih bang 273 kơčăo bruă, hăng rơnoh prăk čih rơkâo tuh pơ alin 850.000 klai, dưm dưm hăng 33 klai đolar. Amăng anun, 144 kơčăo bruă tuh pơ alin 230.000 klai hăng 129 kơčăo bruă kĭ hră hơdor pioh rơkâo tuh pơ alin rơbêh 620.000 klai prăk. Lu sang bruă mơdrô group pơprong hơmâo kĭ pơkôl hăng rơnoh prăk rơbâo klai kah hăng VinEnergo, apui yua pơkra glăi-210.000 klai, Group FLC gah bruă tuai čuă ngui, logistics-150.000 klai, Phú Tài gơnam man pơdong phrâo, sĭ mơdrô lŏn mơnai hăng sang dŏ truh 26.000 klai, laih anun Sun Group tuai čuă ngui hăng sang jưh tuai anih pơdơi pơdă 20.000 klai…..khua mua pơ ala kơ djop sang bruă mơdrô hlăk pok pơhai lu kơčăo bruă pơprong amăng tơring čar, ơi Trần Bá Dương, Khua Jơnum khul git gai sang bruă, khua phun group Thaco hơmâo tơlơi đĭ pơhiăp amăng mông jơnum tui anai:

“Ƀơi Gia Lai, amăng 7 thun laih rơgao, bruă mă gah hră pơar tơlơi phiăn aka ƀu hruaih, laih anun pơmut tơring čar Gia Lai phrâo bruă mă wai lăng gah tơlơi phiăn dưi pơsir hĭ anŏ gun hăng pơtrut hmar ƀiă. Lu kơčăo bruă dưi pok pơhai klă hăng tŭ yua yom, yua hơmâo tơlơi gum hrŏm mơ̆ng gong gai kơnuk kơna  djop gưl amăng tơring čar Gia Lai kah hăng thun blanlaih rơgao gơmơi ƀuăn ngă tui hmar hăng tŭ yua djop kơčăo bruă, djru hrŏm akŏ pơjing atur ngă hmua hơđong brơi kơ tơring čar Gia Lai”.

Hơdôm rơnoh mrô brơi ƀuh lăp bơni biă mă amăng mông jơnum sa anŏ găl pơtrut tơring čar Gia Lai pơđĭ kyar kơtang hloh, dưi ngă djơ̆ tơhnal pơkă dua mrô mơ̆ng thun 2026. Kiăng dưi ngă djop hră pơkôl anun, ơi Thái Đại Ngọc, Khua git gai ping gah tơring čar Gia Lai git gai gong gai djop gưl khom ngă tui bruă djơ̆ 6 mơta tơlơi rơđah: rơđah pô, rơđah bruă, tơđah hrơi mông, rơđah pô glăm ba, rơđah boh tơhnal hăng rơđah tơlơi dưi, anăm lui ôh hơdôm kơčăo bruă anun kơnong čih amăng hră pơar đôč; ƀuăn akŏ pơjing atur  mă bruă ngă hră pơar kơ mơnuih ƀôn sang djơ̆ lăp, lăng kơ bruă ngă hơmâo boh tŭ yua kơ mơnuih ƀôn sang, kơ sang bruă mơdrô yơh anŏ pơđĭ kyar ƀơi tơring čar laih anun amra pơsir khut khăt djop tơlơi ngă soh glăi, ngă tơnap, ngă kaih kơ mơnuih ƀôn sang, kơ sang bruă mơdrô; laih dơ̆ng ăt čang rơmang khul ngă bruă mơdrô pok pơhai djơ̆ hrơi blan laih anun sui thun tong ten hăng tơring čar, pơpŭ kơ gru grua hiam djop djuai ania amăng plơi pla laih anun lir hơbit hăng djop sang bruă mơdrô amăng tơring čar, gum hrŏm ba tơbiă gơnam sĭ mơdrô pơgang rơnoh hơđong truh pơ tač rơngiao. Mơ̆ng boh tơhnal anun, ƀơi mông jơnum Khua git gai ping gah tơring čar Gia Lai, ơi Thái Đại Ngọc lăi pơtong, brơi pơblih tơlơi ƀuăn tuh pơ alin jing hơdôm bruă mă tum teč rơđah rơđong, ba glăi boh tŭ yua sik nik kơ bruă pơđĭ kyar bơwih ƀong huă-mơnuih mơnam tơring čar.

“Gia Lai ƀuăn amra ngă hrŏm, djru klă hloh kơ djop sang bruă mơdrô, sang bruă tuh pơ alin kiăng hơđong pran jua mă bruă, pơkra ming gơnam sĭ mơdrô, hrŏm hăng bruă pơđĭ kyar ba glăi boh tŭ yua. Ƀing gơmơi kiăng hăng čang rơmang biă mă tơring čar Gia Lai ƀu kơnong jing anih hơmâo lu tơlơi gêh găl, rơnuk rơnua hơđong, đôč ôh, amra jing anih djru brơi djop kơčăo bruă tuh pơ alin, tơlơi pơmin pơčeh phrâo dưi ngă tui, pioh kơ ƀing ngă bruă mơdrô hrưn đĭ jing sang bruă mơdrô ba akŏ hlâo amăng bruă mă mơ̆ng gơñu”.

Nao jơnum hrŏm hăng đĭ pơhiăp git gai, Kơ-iăng khua dêh čar ơi Hồ Quốc Dũng lăng yom, bơni biă mă kơ tơlơi gir run mơ̆ng Gia Lai: Boh tơhnal amăng mông jơnum brơi ƀuh, tơlơi đăo kơnang mơ̆ng khul ngă bruă mơdrô, tuh pơ alin anăp nao pơđĭ kyar kơ tơring čar. Kơ-iăng khua dêh čar rơkâo pơhưč tuh pơ alin hơmâo tơlơi ruah mă djơ̆ 3 tơlơi ƀu hơmâo ( ƀu dưi pơblih hăng anŏ pơgang ayuh hyiăng, ƀu ruah sang bruă tuh pơ alin ƀu anăm ngă bruă, ƀu tŭ mă kơčăo bruă ba yua măi mok sô, mơnuih mă bruă ƀu rơgơi laih anun đing nao hơdôm kơčăo bruă FDI rơnuk phrâo, ba yua AI ia rơgơi ană mơnuih pơjing rai, pơkra gơnam pơkĕ apui lơtrik amăng măi mok. Laih dơ̆ng, Kơ-iăng khua dêh čar pơtrun hiăp kơ tơring čar Gia Lai khom lăng kơ tơlơi bơwih ƀong huă jing pran kơtang hloh, pơtrut bruă ngă pơblih phrâo ngă hră pơar djơ̆ hơdră, bơwih brơi mơnuih ƀôn sang hăng ƀing ngă bruă mơdrô amuñ gêh găl hloh, mă tơlơi mơak anun jing gai pơkă kơ bruă ngă, pơsir tơlơi tơnap tap kơ ƀing ngă bruă mơdrô tuh pơ alin:

“Pơtô brơi ten hơdră mă bruă pơđĭ kyar bơwih ƀong huă, sang bruă mơnuih ngă pô, jing anŏ phun kơ tơlơi bơwih ƀong huă. Ngă gêh găl brơi kơ sang bruă mơdrô yua mơnuih ƀôn sang ngă pô, pơđĭ kyar prong tui, tŭ yua; pơsur pran jua akŏ pơjing sang bruă mơdrô hơmâo tơlơi thâo, dưi pơhno kơtang, laih dơ̆ng pơtrut bruă lir hơbit sang bruă mơdrô amăng dêh čar hăng sang bruă mơdrô FDI, pơgang rơnoh yom pơkra ming hăng ba sĭ mơdrô amăng rŏng lŏn tơnah. Ƀing ta khom lăi tơpă, ngă sit nik, ngă truh kih, kiăng hơmâo boh tơhnal ba tơring čar Gia Lai ƀing ta pơđĭ kyar kơtang hloh pơ anăp anai”.

Hăng tơlơi ƀuăn kơtang djơh hăng anun mơ̆ng gong gai kơnuk kơna laih anun tơlơi đăo kơnang mơ̆ng sang bruă mơdrô, Jơnum pơhưč tuh pơ alin thun 2026 ƀu kơnong ba glăi hơdôm rơnoh mrô lăp kơ Gia Lai đôč ôh, dŏ jing anŏ gêh găl pok brơi jơlan phrâo pơđĭ kyar kơtang tui, hơđong kơjăp. Mơ̆ng atur anun, Gia Lai hlăk yak nao pơtong rơđah anih dŏ, kơnuih hiam pơhưč pran jua arăng nao tuh pơ alin ngă bruă mơdrô, anăp nao tơhnal pơkă pơđĭ kyar hmar, tŭ yua hăng mut phung lu hloh amăng bruă mơdrô hăng jar kmar thun blan pơ anăp.