Yua bơbeč djơ̆ kơnam hơjan hlim rơ-ot rai mơ̆ng ia rơsĭ Ngŏ, lơ 25/9, ƀơi lu anih amăng tơring čar Gia Lai hơmâo hơjan prong biă mă. Kiăng plai ƀiă bơbeč sat lŏn tơhlŏm, ia ling dăo ngă, djop tơring glông, plơi pla biă mă ñu hơdôm tơring glông kual ngŏ tơring čar hlăk pơtum ngă tui hơdră pơhlôm, pơgang. Hơdôm tơring glông gah ngŏ Gia Lai amuñ biă hơmâo ia ling dăo, lŏn tơhlŏm ƀơi kual čư̆ čan, ia čroh hnoh, kual plung dơnŭng kah hăng:

Tơring glông Kơƀang, plơi prongAn Khê, tơring glông Đak Đoa, Mang Yang laih anun hơdôm tơring glông Ia Grai, Čư̆ Pah, plơi prong Plei Ku, Čư̆ Prong, Đưk Kơ, hrơi anai hăng pơgi, ăt dŏ hơjan đôč, hŭi biă mă hơmâo tơlơi truh ia ling dăo ngă. Kiăng pơhlôm hlâo hăng pơhrŏ ƀiă anŏ răm ƀăm, Khua mua git gai bruă pơhlôm, pơgang tơlơi truh lŏn adai ngă tơring čar Gia Lai, git gai djop anom bruă pok pơhai brơi tơhan lu sang bruă nao djru mơnuih ƀôn sang dŏ giăm hang ia krông, ia čroh hnoh, kual plung dơnŭng khom pơphun pơdŭ đuăi mơnuih ƀôn sang, kual hơmâo tơlơi truh lŏn tơhlŏm, ia kor kơtang, ling dăo ngă.