Yap truh akŏ blan 6/2026, akŏ bruă man pơdong sang hră kơnuk kơna čem rông ba pơlir gưl I hăng gưl II ƀơi 7 boh să giăm guai gah Yŭ tơring čar Gia Lai hơmâo pơgiong giăm 50% bruă man pơdong. Samơ̆, abih bang 7 boh sang hră ră anai ngă kaih mơng 15 truh 52 hrơi pơhmu hăng tơlơi pơkă.

Khul wai lăng hơdôm akŏ bruă tuh pơ alin man pơdong tơring čar Gia Lai rơkâo, mơng anai truh abih lơ 30/8, hơdôm anom bruă mut hrŏm man pơdong, pơtum pơƀut djop mơnuih mă bruă, gơnam măi mok, pel ĕp glăi hơdôm anih man pơkra, pơhrua mơnuih mă bruă, măi mok hăng pơphun man pơdong na nao kiăng pơhlôm pơgiong boh sang hră. Hơdôm anih anom črâo ba, krăo lăng kiăng kiăo tui lăng tơl anih, wai lăng kjăp bruă man pơkra, pơhlôm rơnuk rơnua brơi mơnuih mă bruă, ƀu djơ̆ yua kiăng ngă tañ mơ̆ bơdjơ̆ nao bruă man pơkra. Ơi Phạm Xuân Điệp, Khua khul wai lăng hơdôm akŏ bruă man pơdong tơring čar Gia lai brơi thâo: “Hơmâo 2 bruă yôm hloh lĕ pơsir hĭ hơdôm tơlơi tơnap tap, tơlơi ngă gun mơng anom bruă man pơdong, kiăng anom bruă man pơdong pok pơhai ngă bruă gêh gal. Dua lĕ khul wai lăng amra gum hrŏm hăng hơdôm boh ƀon lan hăng hơdôm anih anom hăng anom bruă man pơdong kiăng pơkiăo nao mơnuih djru brơi kiăng pơhlôm lu ƀiă mơnuih pơhrua brơi anom bruă man pơdong”.

Amăng mông pok pơphun, anom bruă tuh pơ alin, anom bruă črâo ba krăo lăng hăng hơdôm anom bruă man pơdong hơmâo kĭ tơlơi ƀuăn pơhlôm djơ̆ hrơi mông, man pơdong sir kjăp hăng rơnuk rơnua brơi mơnuih mă bruă, gir run pơgiong akŏ bruă tui djơ̆ tơlơi git gai mơng Ding jum kơđi čar, Kơnuk kơna hăng Jơnum min mơnuih ƀon sang tơring čar Gia Lai. Ơi Trần Bảo, kơ-iăng Khua kông ti TNHH tuh pơ alin man pơdong Dacinco, anom bruă man pơdong sang hră kơnuk kơna čem rông ba pơlir gưl I hăng gưl II Ia Dom lăi pơthâo hơdră ngă bruă mơng anom bruă: “Ayuh hyiăng ră anai, rĭm hrơi lêng ƀuh hơjan mơng 2-3 wŏt. Ƀing gơmơi hơmâo jơlan ngă bruă mơtăm, hơmâo 5-6 tơhnal kiăng ngă tui. Tal blung a lĕ pơhlôm brơi lu mơnuih mă bruă, ră anai rĭm boh sang hră, ƀing gơmơi hơmâo 320 čô kông ñơn. Dua dong lĕ pơhlôm ngă lu tui, mơng 2 truh pơ 3 ca rĭm mơnuih. Lơm hơjan, ƀing gơmơi amra hơmâo pơhrua mông mă bruă dong. Laih dong rơkâo ƀing kĩ sư kiăo tui lăng kiăng pơhlôm brơi bruă man pơdong klă hloh”.

Akŏ bruă man pơdong sang hră kơnuk kơna čem rông ba gưl I hăng gưl II ƀơi tơring čar Gia Lai hơmâo abih tih prăk tuh pơ alin rơbêh 1.516 klai prăk, hơmâo pok pơhai man pơdong ƀơi 7 boh să giăm guai hơmâo Ia Mơ, Ia Puch, Ia Pnôn, Ia Nan, Ia Dom, Ia Chía hăng Ia O. Lơm pơgiong, hơdôm boh sang hră anai amra pơhlôm brơi rơbêh 7.000 čô čơđai mut hrăm hăng lu anih hrăm, anih dŏ, sang ƀong huă, anih dŏ brơi ƀing nai hăng hơdôm ring bruă jum dar dong. Akŏ bruă anai yôm phăn biă mă amăng pơhlôm brơi klă bruă pơtô hrăm ƀơi kual giăm guai tơring čar Gia Lai./.