VOV4.Jarai-Jơnum min mơnuih ƀôn sang tơring čar Gia Lai phrâo jơnum pơtong glăi bruă mă amăng 9 blan rơgao, pok pơhai bruă mă 3 blan rơnuč thun. Khua Jơnum min mơnuih ƀôn sang tơring čar Gia Lai rơkâo ƀing ding kơna git gai amăng tơring čar, khom gir run abih pran jua, djop sang bruă, anom bruă gum pơgôp nao rai, khut khăt ngă bruă hơdai gum hrom kiăng sa amăng plĕ pơsir hơdôm bruă ngă giong tơhnal pơtrun, pơđĭ kyar tơlơi bơwih ƀong huă mơnuih mơnam, pơgang tơlơi rơnuk rơnua dêh čar thun 2022.

Pơhiăp ƀơi mông jơnum, ơi Nguyễn Hữu Quế-Khua Gơnong bruă Man pơphô hăng tuh pơ alin Gia Lai brơi thâo: Gia Lai lĕ sa amăng hơdôm tơring čar mă yua prăk čan pioh man pơdong ƀiă đơi. Amăng anun, Khul git gai wai lăng kơčăo bruă tuh pơ alin ƀơi tơring čar hăng djop anom bruă wai lăng hơdôm kơčăo bruă phun, yôm hơmâo rơnoh prăk tuh pơ alin lu lĕ prăk mă yua aset. Hrup hăng kơčăo bruă čuk pơkra jơlan dar gah Ngŏ pioh pơtrut bơwih ƀong huă tuh pơ alin hăng rơnoh truh kơ 1.200 klai prăk, phrâo ngă giong hră pơar, prăp lui pok bruă či pơphun juă nua pô tuh pơ alin čuk pơkra; kơčăo bruă čuk pơkra jơlan Phù Đổng, plơi prong Pleiku khom sem glăi hơdră ngă hră pơar. Rơngiao kơ anun, hơdôm bruă mă kaih amăng bruă ngă hrom jao glăi lŏn anih čuk pơkra jơlan ngă kaih hĭ bruă mă.

Ơi Trương Hải Long-Khua jơnum min mơnuih ƀôn sang tơring čar Gia Lai

 đĭ pơhiăp amăng mông jơnum

Ơi Nguyễn Hữu Quế Khua Gơnong bruă Man pơphô hăng Tuh pơ alin Gia Lai lăi pơthâo kơčăo bruă čuk pơkra jơlan Nguyễn Chí Thanh plơi prong Pleiku hăng jơlan pơtruh nao rai hluh gah klâo boh tơring glông Čư̆ Sê, Čư̆ Pưh hăng Čư̆ Prong črăn găn nao pơ Čư̆ Pưh:

“Jơlan Nguyễn Chí Thanh, plơi prong Pleiku aka jao glăi ôh pioh čuk pơkra. Khul git gai wai lăng čuk pơkra dŏ gun hĭ. Ƀudah tơring glông Čư̆ Pưh, kâo pô mơtam ba akŏ hlâo grup nao sem lăng, pơtrut brơi pơklaih ala lŏn či čuk pơkra 1,3 km ƀơi tơring kual Nhơn Hòa. Khua Jơnum min mơnuih ƀôn sang tơring glông Čư̆ Pưh phrâo kĭ hră duh glăi prăk kơ 50 boh sang anŏ hơmâo lŏn djơ̆ anih čuk jơlan, dŏ glăi 34 boh sang anŏ dŏ ƀơi anih tơkuh nao rai jơlan 14 aka ƀu jao ôh”.

Tui hăng ơi Nguyễn Hữu Quế, phun ñu ngă kaih lĕ yua bruă prăp lui hơdôm kơčăo bruă kaih đơi, dŏ gun lu mơta hăng lu anih khom duh glăi prăk pô lŏn, pioh jao glăi anih čuk pơdăo pơkra jơlan. Khă tui anun, lu đơi kơčăo bruă pok pơhai hăng pơphun pok pơhai amăng 3 blan tal pă thun anai mă yua prăk čan tañ hloh. Pơ anăp anai, Gơnong bruă Man pơphô hăng tuh pơ alin lăi pơthâo hăng Jơnum min mơnuih ƀôn sang tơring čar Gia Lai ngă hră git gai brơi tuh pơ alin pơtrut bruă mă yua prăk hăng akŏ pơjing 4 grup nao sem lăng, pơtrut mă bruă, pơsir hơdôm tơlơi tơnap tap, dŏ gun kiăng kơ bruă tuh pơ alin thun 2022 giong hĭ. Truh ră anai, pơtrut mă yua prăk čan man pơdong mơ̆ng tơring čar kơnong dưi ngă 31%, giăm bơkơnar hnong pơkă dưm dưm amăng dêh čar.

Kơ bruă duh jia pơhrui prăk ră anai tơring čar hơmâo pơhrui glăi 4.100 klai prăk, giăm 30%  pơkă hăng thun hlâo. Ơi Nguyễn Anh Dũng, Khua Gơnong bruă Prăk kăk tơring čar Gia Lai brơi thâo, phun ñu tơring čar bưp tơlơi tơnap tap lĕ, amăng bruă pơhrui glăi prăk yua lŏn duh jia yua lŏn lu kơčăo bruă tơnap tap đơi. Ơi Dũng rơkâo đĭ ngă tui lu hơdră kiăng pơhrui glăi prăk kơ kơnuk kơna amăng hơdôm blan rơnuč thun:

“Ƀing gơmơi rơkâo hăng Jơnum min mơnuih ƀôn sang tơring čar pơtum git gai djop sang bruă, anom bruă brơi jŭ yap glăi djop kơčăo bruă yua lŏn, kiăng ngă giong hră pơar pioh pơhưč tuh pơ alin, mă yua anŏ gêh găl, pơhrui djop rơnoh prăk jia. Boh yôm phun tal dua lĕ, ƀing gơmơi amra ngă hrom Anom bruă duh jia jŭ yap glăi amăng 3 blan rơnuč thun pioh ngă djơ̆ tơhnal pơkă duh jia thun 2022”.

Gia Lai hlăk ngă kaih pơkă hăng anŏ pơkă, bruă hơmâo jao

Hrom hăng anun, tuh pơ alin bruă čar hăng pơhrui prăk jia, jơnum tal anai mơ̆ng Jơnum min mơnuih ƀôn sang tơring čar Gia Lai ăt lăi pơthâo lu tơlơi kiăng pơsir hĭ kah hăng: Pơblih bruă tuh pơ alin, pơhlôm kman ngă sat phun pla hăng pơgang klin kơ hlô mơnong rông, jơlan hơdră rŭ glăi bơwih ƀong huă, sĭ mơdrô boh troh đang hmua….Pơhiăp git gai jơnum, ơi Trương Hải Long-Khua Jơnum min mơnuih ƀôn sang tơring čar Gia Lai pơtrun hiăp djop gơnong bruă, sang bruă tơring čar khom gum pơgôp nao rai, pok pơhai bruă mă pơsir hơdôm tơlơi dŏ gun kơƀah, tơhnal pơkă bơwih ƀong huă mơnuih mơnam thun 2022 ƀơi tơring čar:

“Pơtum pok pơhai hơdôm boh yôm phun ngă kaih pơkă hăng akŏ bruă pơtrun laih anun lăi pơthâo hơdră kiăng pơsir tơlơi tơnap, dŏ gun; pơhrui prăk jia, mă yua prăk tuh pơ alin man pơdong bruă čar, hơdôm kơčăo bruă, hơdră ngă rŭ glăi tơlơi bơwih ƀong huă mơnuih mơnam; bruă ia jrao, mă yua lŏn tơnah djop plơi pla; pơkra ming sĭ mơdrô, pơgang klin, kman phun boh troh, hlô mơnong rông; tơlơi ngă soh tơlơi phiăn. Khua djop sang bruă, gơnong bruă, khua djop tơring glông, plơi prong khom pok pơhai tañ hơdôm bruă mă hrom hăng ƀing Kơ-iăng khua jơnum min mơnuih ƀôn sang tơring čar hơmâo lăi pơthâo laih”.

Khua jơnum min mơnuih ƀôn sang tơring čar Gia Lai ăt rơkâo abih bang ding kơna jơnum min mơnuih ƀôn sang tơring čar, djop gơnong bruă hăng khua mua tơring glông khom gum pơgôp nao rai, gir run pơsir bruă mă hăng abih pran jua, ngă hrom djru nao rai sa amăng plĕ pok pơhai ngă giong tơhnal pơkă, hơdră pơtrun bơwih ƀong huă mơnuih mơnam, pơgang dêh čar hơđong tơlơi rơnuk rơnua thun 2022.

VOV Dap Kơdư-Nay Jek: Pơblang