Ngă tui tơlơi pơtrun mrô 57 mơng Ding jum kơđi čar kơ pơplih yua boh thâo phrâo, tơring čar Gia Lai đing nao pơkra ming gơnam măi mok ƀơi ƀon lan hăng pơtô brơi bruă mă yua boh thâo măi mok brơi ƀing apăn bruă, mơnuih mă bruă hăng mơnuih ƀôn sang, sit biă ñu lĕ kual ataih, asuek, kual mơnuih djuai ania ƀiă. Truh ră anai, bruă pơplih yua boh thâo măi mok hơmâo lu tơlơi dưi prong.

Mơng lơ 1/7, Jơnum min mơnuih ƀôn sang tơring čar Gia Lai hơmâo pơgiong bruă dưm dăp anih anom, gơnam măi mok, glông mă yua internet ƀơi 135 boh să, phường tơdơi kơ pơmut hrŏm, pơhlôm brơi kơ bruă tŭ mă, ngă brơi hră pơ-ar klă hloh kơ mơnuih ƀôn sang. Grup yua boh thâo măi mok hơmâo tŏ tui djru bruă ƀơi hơdôm boh să, phường, tơring čar Gia Lai djru brơi ƀing apăn bruă ƀơi anom bruă ha bah amăng hăng črâo brơi mơnuih ƀôn sang yua măi telephôn ngă hră pơ-ar mơng ataih. Bruă pok pơhai ha amăng plĕ hơmâo pơplih tong ten amăng wai lăng, pơplih ngă hră pơ-ar, laih dong hrưn đĭ tơlơi pơmĭn yua măi mok amăng mơnuih mơnam, pơtrut pơplih yua boh thâo phrâo djop mơta.