Tơring čar kiăng hơdôm boh tơring ngă tañ ƀiă, ba pơđuăi sang anŏ hơmâo sang tơglưh abih hăng tañ man pơdong glăi kiăng neh wa hơđong tơlơi hơdip sui pơ anăp. Tui hăng hră yua Gơnong bruă hmua hăng ayuh hyiăng pơdah pơ Jơnum min mơnuih ƀôn sang tơring čar, Gia Lai amra ba pơđuăi ječ mơtăm 1.861 boh sang anŏ ƀơi 16 kual; amăng anun 9 kual gah Ngŏ (tơring čar Bình Định hơđăp) hăng 907 akŏ sang, hăng 7 kual gah Yŭ,  hăng 954 akŏ sang. Prăk pioh pơdong plơi phrâo him lăng rơbêh 1.840 klai, či man pơdong sang, djru brơi neh met wa hăng pioh čuk pơkra anih anom.

Ơi Phạm Anh Tuấn, Khua jơnum min mơnuih ƀôn sang tơring čar Gia Lai brơi thâo, kiăng pơdong plơi phrâo tañ hăng tŭ yua, hơdôm boh tơring kiăng ngă tañ, lăng glăi abih bang, prăp rơmet tui tơlơi kiăng dŏ plah nao rai. Amăng anun, djru brơi hlâo hăng hơdôm boh sang anŏ ter hang ia rơsĭ tơglưh sang yua ia dăo.