VOV4.Jarai - Mơguah lơ 19/10, Jơnum min djop djuai ania mơnuih mơnam dêh čar Việt Nam tơring čar Gialai pơphun Jơnum bưp ƀô̆ mơta, bơni mơnuih hmâo arăng đăo gơnang mơbruă amăng kual neh wa djuai ania ƀiă amăng tơring čar tal 4, thun 2022. Đơ đam tơring čar Gialai ră anai hmâo 955 čô mơnuih tha plơi, mơnuih hmâo arăng đăo gơnang mơbruă amăng kual djuai ania ƀiă.

Khua Jơnum min mơnuih ƀôn sang tơring čar Gialai ƀơk hră bơni kơ mơnuih hmâo arăng đăo gơnang mơbruă

Hơdôm thun rơgao, ƀing tha plơi, mơnuih hmâo arăng đăo gơnang hmâo pơsur laih mơnuih ƀôn sang gum hơgôp rơbêh kơ 700 klai prăk, pĕ pha 132.000 met kơ rê lŏn pioh pơkra hơdôm ring bruă mă yua kơ mơnuih ƀôn sang; Djru brơi rơbêh kơ 20.000 bôh sang anô̆ ƀun rin neh wa djuai ania ƀiă pơplih tơlơi pơmin, bruă mă ngă đang hmua. Truh ră anai, đơ đam tơring čar Gialai hmâo laih 91 bôh să djơ̆ hăng plơi pla phrâo, tơlơi hơdip bơwih ƀong amăng kual neh wa djuai ania ƀiă jai hrơi jai dưi pơplih; gru grua bôh thâo dưi pơgang ba hăng ngă tui. Ƀrô djơ̆ tal anai, Jơnum min mơnuih ƀôn sang tơring čar Gialai hăng Jơnum min djop djuai ania mơnuih mơnam dêh čar Việt Nam tơring čar ƀơk hră bơni kơ 200 čô mơnuih hmâo arăng đăo gơnang mơbruă amăng neh wa djuai ania ƀiă./.

VOV Tây Nguyên/Siu H’ Prăk pơblang