Čơtlăm lơ 4/11, Ping gah tơring čar Gialai hmâo pơphun Jơnum klah čun 5 thun ngă tui jơlan hơdră mrô 38 mơng Grŭp apăn bruă Ping gah tơring čar ngă tui Tơlơi črâo ba mrô 13 mơng Grŭp git gai bruă ping gah kơ kơtưn tơlơi git gai mơng Ping gah pioh kơ bruă wai lăng, pơgang hăng pơlar dlai tlô amăng tơring čar.

Tui tơlơi pơhing bruă jơnum, truh ră anai, Gialai phun ñu ngă giong laih bruă pel ĕp glăi, pơplih pơkra pơkă kual 3 djuai dlai truh thun 2025, tơhnal lăng truh thun 2030, ngă gal brơi bruă wai lăng, pơgang dlai ƀơi tơring čar. Tơring čar hmâo iâu pơhrui laih rơbêh kơ 1000 klai prăk mơng ngăn drăp kiăng apah wai lăng dlai tlô. Hơdôm bôh anom bơwih ƀong, sang anô̆, rim mơnuih hmâo gum hrom pla laih rơbêh kơ 24.000 ektar dlai kyâu.

Khă hnun hai, bruă wai lăng, pơgang dlai ƀơi Gialai ăt dô̆ mơn lu tơlơi tơnap yua kơ prăk mă yua akă djơ̆ hăng tơlơi kiăng; lu kual lŏn pla kyâu hmâo arăng rô̆ mă; tơlơi sua mă lŏn dlai ăt dô̆ lu mơn, lu kual lŏn dlai răm rai prong. Tơring čar Gialai hrưn đĭ truh thun 2025 amra ngă prong tui anih gôm phun kyâu hmâo 47,75%. Rim thun pla phrâo 8000 ektar dlai hăng pơlar phun jrao gah rơgôp tơ-ui kyâu./.