Gum hrom tal hyu hơduah ĕp, kuai mă, ba glăi tơlang tơleh ling tơhan pơsăn drơi tal anai hmâo giăm truh 70 čô mơnuih apăn bruă, tơhan gah Grŭp K52, Anom bruă kơđi čar, Ƀirô git gai Khul ling tơhan tơring čar Gialai, dưi pơpha jing hơdôm grŭp, anih anom pơphun hyu ĕp ƀơi rơbêh kơ 3 jơlan gah ƀơi 3 bôh tơring čar Preah Vihear, Stung Treng hăng Ratanakiri, dêh čar Kur.

Hrơi pơkă mơng ră anai truh abih bơyan phang thun 2022-2023. Hăng pran pơsit hrưn đĭ rim grŭp, anom bruă ĕp ƀuh tơlang tơleh mơng 7 truh 10 čô ling tơhan pơsăn drơi. Anai lĕ tal 22 Grŭp K52 Gialai nao mă bruă.

Amăng 21 tal hlâo, Grŭp hmâo hyu ĕp, tum pơƀut hăng ba glăi tơlang tơleh hmâo 1.446 čô ling tơhan pơsăn drơi, tơhan nao gum djru hăng mơnuih juăt bruă tơhan Việt Nam pơsăn drơi amăng hơdôm tal blah ngă ƀơi dêh čar Kur./.