Tui hăng tơlơi lăi pơthâo glăi ƀơi mông jơnum, amăng 2 blan akŏ thun, bơwih ƀong huă hơđong mơn, bruă pơđĭ nua soh tơlơi phiăn hơmâo pơgăn, rơnoh đĭ kyar hơmâo đĭ tui mơn, hơdôm tơlơi bơkơnar prong mơ̆ng tơlơi bơwih ƀong huă hơmâo pơhlom. Mrô pơkă nua gơnam hăng blơi gơnam đĭ giăm 3% pơhmu hăng tơđar. Prăk pơhrui kơ kơnuk kơna hơmâo rơbêh 600 rơbâo klai, đĭ 13% hăng tơđar thun hlâo. Prăk pơhrui blơi mut gơnam hăng čar rơngiao hơmâo 155 klai USD, đĭ rơbêh 20% pơhmu hăng tơđar. Klah čun mông jơnum, Khua dêh čar ơi Phạm Minh Chính lăi dlăm kơ hơdôm tơlơi gêh găl klă mơ̆ng bruă bơwih ƀong huă mơnuih mơnam.

Khua dêh čar ta lăi, khŏm khut khăt, gir kơtir hloh, prăp rơmet mă pô, pơčeh phrâo, ngă tŭ yua Tơlơi pơtrun Ping gah dêh čar tal 14 hăng hơdôm Tơlơi pơtrun akŏ bruă phun mơ̆ng Ding jum kơđi čar. Khua dêh čar kiăng prăp lui klă hloh kơ hrơi ruah ƀing khua pơ ala mơnuih ƀôn sang dêh čar hăng khua pơ ala mơnuih ƀôn sang djŏp gưl, Jơnum ping gah lok 2, Jơnum lok 1 mơ̆ng Ƀirô khua pơ ala mơnuih ƀôn sang dêh čar tal 16. Khua dêh čar kiăng djŏp ding jum, anom bruă, tơring čar ƀôn prong kơđiăng hơdôm tơlơi bơbeč djơ̆ dêh čar ta, biă ñu tơlơi blah ngă ƀơi Trung Đông hăng hơdôm kual pơkŏn ră anai. Khŏm gir bong kjăp tơlơi bơwih ƀong huă, pơgăn hĭ nua gơnam đĭ ča čot hăng pơtrut kiăng rơnoh đĭ kyar rơbêh 10%.