Kual glai mrô 547A, gah kông ty wai pơgang kyâo glai Ƀuôn Yă Wằm, tơring glông Čư̆ Mgar, tơring čar Dak Lak hơdôm blan giăm anai arăng phă pơrai na nao đôč. Ƀơi anih ataih mơ̆ng sang bruă dŏ krăo pơgang glai mrô 1 aka truh 100 met ôh, ƀơi jơlan mut nao amăng glai, hơmâo 1 ha lŏn, kyâo pơtâo arăng koh drôm, pơrơkă pơrơkưng. Ƀơi anih ataih ƀiă, jum dar anun hơmâo lu phun kyâo arăng băn hĭ phun, kiăng kyâo djai krô tui. Ơi Trần Hồng Minh, mơnuih mă bruă ƀơi sang krăo pơgang glai rưng mrô 1 brơi thâo, dŏ kyâo glai lĕ, arăng nao koh drôm, phă pơrai đôč. Lơ̆m ƀuh, nao pơgăn gơñu ngă glăi mơtam, ƀơi anŏ gơñu iâu lu mơnuih rai pơhŭi pơ-an ngă sat kơ ta. Ơi Minh lơ̆m blan 6 laih rơgao ăt hơmâo hơdôm hơpluh čô mơnuih taih čom ngă sat tơl nao đih pơ sang ia jrao:

“Mơnuih ƀôn sang hyu mut dŏ bă hră amăng glai klô, čông jơnah jah drôm tă tăn lŏn glai anun yơh tơnap biă mă pơgang. Ră anai gleh glar đơi, kâo pô phrâo anai gơñu hil rơ̆t rai tơl anih mă bruă taih kâo, ruă nuă tơl nao đih pơ sang ia jrao”.

Hrŏm hăng kual glai 547A, lu kual glai pơpha wai lăng pơkŏn mơ̆ng kông ty pơgang kyâo glai Ƀuôn Yă Wằm, ăt arăng phă pơrai koh drôm mơ̆n. Tơlơi arăng hyu phă glai ƀuh ba mơtam, gơñu ƀu hŭi kơ hlơi ôh, tơl kual lŏn giăm anih tơhan pơgang glai dŏ hai gơñu ăt ƀu hŭi lơi. Ƀơi hơdôm anih glai klô arăng koh drôm, ngă hmua pla pơjing, kah hăng phun rơtă rơbai, pơdai kơtor ƀing klĕ dŏp kiăng lông ba mơtam kiăng lăi gơñu ngă pô. Ơi Nguyễn Công Thắng, Khua anom bruă tơhan pơgang glai rưng mrô 3 ăt amlaih pran jua pơhaih yơh lăi, ƀu anăm pơgang glai dơ̆ng tah, arăng jah drôm, koh kyâo pơrai kông ngăn glai klô, kơsing bơrơsua mă lŏn. Bruă ngă tơnap tap laih, hŭi rơhyưt dơ̆ng samơ̆ prăk blan ƀu djop ƀong huă ôh. 5 blan hăng anai, adơi ayong mă bruă tơhan pơgang glai klô aka ƀu hơmâo prăk blan djop ôh. Mrô mơnuih pơdơi bruă jai hrơi lu, bruă mă tơnap tap hloh:

“Mơnuih ƀôn sang hyu dŏ tă tăn amăng glai, gơñu mut nao jah drôm lơ̆m anun tơhan pơgang glai lĕ ƀiă đơi, tơnap tap biă mă kơ adơi ayong mă bruă. Hyu mă bruă mrô tơhan ƀiă mơnuih, mơnuih ƀôn sang lĕ hyu dŏ amăng glai klô lu tui, hiư̆m ta anăm wai lăng kiăo  tui khă ƀing gơñu. Prăk blan sa čô kơnong  3 klăk prăk sa blan, ƀing sui thun ƀiă lĕ, 5 klăk prăk sa blan, mă bruă wơ̆t hrơi pơdơi, hrơi lơphet, kah hăng hrơi tơjuh, hrơi năm arăng pơdơi, gơmơi mă bruă đôč. Prăk blan ră anai, kông ty aka ƀu tla ôh 5 blan laih. Hơmâo hơdôm čô pơdơi bruă, tơlơi hơdip ƀu hơđong mă bruă tơnap biă mă”.

Ơi Nguyễn Tất Văn, Khua kông ty wai lăng kyâo glai Ƀuôn Yă Wằm brơi thâo, yap truh blan 9, amăng đơ đam lŏn glai anom bruă gơñu wai lăng hơmâo 303 wơ̆t arăng phă glai pơrai rưng truh rơbêh 96 h. Amăng anun, 99% mrô ngă soh ƀu thâo pô ôh. Amăng mrô 8.800 ha sang bruă gơñu wai lăng, eă anai dŏ 3000 ha đôč glai, samơ̆ ƀrư̆ hrơi ăt hrŏ tui mơ̆n:

“Phă glai pơrai rưng, kơsing mă lŏn kông ty mơ̆ng akŏ thun truh ră anai lu biă mă, tơnap tap pơsir. Ƀuh rơđah glai klô Ƀuôn Yă Wằm ră anai, dŏ lu kual lŏn kyâo abih laih, glai lŏn khăng khăi hăng glai lŭk pŭk anun yơh tơlơi arăng mut phă glai pơrai rưng kơnong ƀiă thun blan đôč rơngiă đơ đam lŏn glai prong biă mă yua kơ kyâo pơtâo anet koh drôm amuñ”.

Ơi Trương Văn Dự, Khua anom bruă tơhan pơgang glai rưng tơring glông Čư̆ Mgar, tơring čar Dak Lak brơi thâo, bruă wai lăng, pơgang glai rưng mơ̆ng kông ty pơgang glai Ƀuôn Yă Wằm lĕ hlăk tơnap tap ƀu hơđong ôh. Kơnong 9 čô tơhan, mơnuih mă bruă mơ̆ng kông ty anai, ƀu anăm ôh wai pơgang truh 8.800 ha glai rưng. Djơ̆ blan ñu lu, anom bruă tơhan pơgang glai rưng, khom nao mă bruă abih 7-8 čô dŏ amăng glai klô pioh pơgang glai Ƀuôn Yă Wằm, samơ̆ kơnong ƀiă hrơi blan đôč mơ̆n, sit tơhan pơgang glai tơbiă đuăi gơñu mut nao jah drôm dơ̆ng yơh.

Ră anai, kông ty pơgang glai kyâo Ƀuôn Yă Wằm akŏ pơjing jing 2 boh anom bruă ngă ding kơna, hơmâo mơnuih ƀôn sang mut ngă hrŏm samơ̆ aka ƀu ba glăi boh tŭ yua ôh:

“Kâo ƀuh bruă mă mơ̆ng kông ty ră anai tơdu biă mă, ƀu anăm wai pơgang ôh kyâo glai. Ră anai, kông ty lăi pơčrong sai brơi iâu pơmut mơnuih mă bruă djru pơgang kyâo glai, bơ prăk blan lĕ aset seo đôč, kông ty dong hnưh prăk blan ƀing mă bruă, sit mơ̆n ƀu hơmâo hlơi khin rai mă bruă ôh. Gơmơi ăt rơkâo Gơnong bruă Đang hmua hăng pơđĭ kyar plơi pla, lăi pơthâo hăng khua mua tơring čar, glai lĕ mơ̆ng tơring čar jao anun khom lăi pơthâo hăng pô wai lăng, kơnuk kơna pơpha trun dơ̆ng prăk apah mă bruă kiăng hơmâo djop mrô tơhan mă bruă hyu tir hăng pơgăn arăng phă glai pơrai rưng”.

Lu thun rơgao ƀơi glai kông ty pơgang glai Ƀuôn Yă Wằm hơmâo na nao arăng phă pơrai, lŏn mơnai glai klô jing kah hăng tơlô̆ ƀañ ƀing klĕ dŏp hyu bơrơsua pĕ ƀong. Rơbêh 5.800 ha amăng mrô 8.800 ha ƀu hơmâo kyâo amăng glai dơ̆ng tah, năng ai 3000 ha glai dŏ ƀiă kyâo pơtâo ăt rơwet hĭ mơ̆n. Hăng tơlơi hơmâo djơh hăng anun, lŏn mơnai glai klô răm ƀăm kơtang, ƀing hyu phă pơrai glai rưng ƀu hŭi kơ hlơi ôh, gơñu lông pran jua hăng tơlơi phiăn pơkă ră anai, lŏn glai Ƀuôn Yă Wằm sit mơ̆n amra či rơngiă tañ mơtam yơh.