Tơdơi kơ 3 thun ngă tui jơlan hơdră gum hrŏm pôr pơhing, Gong phun jua pơhiăp dêh čar Việt Nam hmâo pơphun ngă rai laih rơbêh kơ 3.000 mơta tơlơi pơhing, tơlơi čih, tơña lăi glăi tơlơi tơña, tô nao rai bruă pơtui jua pơhiăp tui tlôn kơ hơdôm bruă bơwih ƀong, bôh thâo, mơnuih mơnam, rơnuk rơnua plơi pla – lŏn ia amăng tơring čar Dak Lak. Hrŏm hăng anun, hmâo ngă rai hăng pơtui 1.816 jơlan hơdră tui akô̆ bruă tơlơi djuai ania ƀiă, anun lĕ: 908 jơlan hơdră tơlơi Êđê hăng 908 jơlan hơdră tơlơi Bơnông, jing dua tơlơi pơhiăp amăng tơring čar Dak Lak. Amăng 6 blan akô̆ thun 2023, Gong phun jua pơhiăp dêh čar Việt Nam hmâo laih 480 mơta tơlơi pơhing phrâo, tơlơi čih djop mơta lăi nao hơdôm bruă bơwih ƀong, bruă kơđi čar, rơnuk rơnua plơi pla lŏn ia mơ̆ng tơring čar.

Amăng hơdôm hrơi tơlơi rơnuk rơnua bruă kơđi čar ƀơi sa dua bôh tơring glông, plơi prong mơ̆ng tơring čar Dak Lak hmâo tơlơi pơlih tơnap, Gong phun jua pơhiăp dêh čar Việt Nam hmâo pioh laih lu mông pôr pơhing tơlơi pơhing phrâo, tơlơi čih lăp djơ̆ kơdŏng glăi hơdôm tơlơi pơčeh ča, pơtrut pơsuh mơ̆ng ƀing kơdŏng glăi kơnuk kơna; lăi đĭ bruă mă klă mơ̆ng neh wa ƀơi anăp tơlơi pơplih mơ̆ng tơlơi hmâo hăng tơlơi ƀlok glăi, rơkâo pap ñai mơng ƀing jrôk jơlan.

Pơhiăp amăng mông jơnum, Ding kơna Ping gah dêh čar, Khua phun akha Gong phun jua pơhiăp dêh čar Việt Nam Đỗ Tiến Sỹ pơsit, tơdơi kơ 3 thun ngă tui jơlan hơdră gum hrŏm, bruă gum hrŏm lăi pơhing jơlan gah, tơlơi pơmin, hơdră pơtrun mơ̆ng Ping gah, hơdră bruă, tơlơi phiăn mơ̆ng Kơnuk kơna truh hăng djop mơnuih dô̆ ƀơi tơring čar Dak Lak dưi ngă tui hmâo akô̆ tlôn hăng juăt bruă hloh. Tơring čar Dak Lak hmâo hăng glăk hmâo tơlơi gal kơ mơnuih mă tơlơi pơhing phrâo Gong phun jua pơhiăp dêh čar gum hrŏm bruă mă ƀơi tơring čar. Hrŏm hăng anun, tơring čar hmao tlôn lăi pơthâo tum djop hơdôm tơlơi pơhing mơ̆ mơnuih čih tơlơi pơhing đing nao amăng anun hmâo hơdôm mơta tơlơi hơdip mơda, bôh thâo, bruă kơđi čar, bơwih ƀong, mơnuih mơnam rơnuk rơnua plơi pla – lŏn ia pioh mơnuih hmư̆ lăng hmâo jơlan lăng nao djơ̆, abih bang hăng sit nik hloh. Khua phun akha Gong phun jua pơhiăp dêh čar Việt Nam Đỗ Tiến Sỹ pơtŏng sit, Gong phun jua pơhiăp dêh čar Việt Nam hmâo hăng glăk hmâo gum hrŏm hăng tơring čar Dak Lak amăng pơtrut kơtang hloh dong bruă pôr pơhing, lăi pơhing. Amăng anun biă ñu đing nao kiăo tui hơdôm hơdră pơtrun, hơdră bruă hmâo tơhnal pha ra ha jăn kơ kual Dap Kơdư hăng Dak Lak:

 “Pơ̆ anăp anai ƀing gơmơi ăt pơsit mơn amra gum hrŏm hăng ƀing gih kiăo tui hơdôm Tơlơi pơtrun pơsit mơng Ping gah dêh čar, črâo ba mơ̆ng Gong gai, tơlơi črâo ba mơ̆ng Grŭp črâo ba 35 kơ pơgang pơgăn tơlơi ngă pơplih rơnuk rơnua, laih anun hơdră bruă djuai ania, 3 jơlan hơdră pơkă mơ̆ng dêh čar. Biă ñu klah čun 67 mơ̆ng Ding jum kơđi čar, Tơlơi pơtrun pơsit 103 mơ̆ng Gong gai dêh čar hăng Tơlơi pơtrun pơsit 72 mơng Khua pơ ala mơnuih ƀôn sang kơ pơphô sa hơdră bruă pha ra kơ plơi prong Buôn Ma Thuột, pơ̆ anăp anai ƀing gơmơi amra djru hrom hăng ƀing gih ngă tui bruă pôr pơhing lăp djơ̆ hăng hơdôm tơlơi pơhing klă hloh”.

Lăng glăi 3 thun ngă tui jơlan hơdră gum hrŏm, Ding kơna Ping gah dêh čar, Khua git gai Ping gah tơring čar Dak Lak Nguyễn Đình Trung brơi thâo, hơdôm tơlơi čih pôr pơhing mơ̆ng Gong phun jua pơhiăp dêh čar Việt Nam pôr kơ djop mơta bruă mă mơ̆ng tơring čar Dak Lak hmâo pioh glăi laih gru pơđom pioh dơlăm hăng dưi hmâo arăng pơsit yôm. Biă ñu, bruă Gong phun jua pơhiăp dêh čar Việt Nam hmâo lu jơlan hơdră pơtui jua pơhiăp hăng tơlơi djuai ania ƀiă ƀơi Dak Lak hăng kual Dap Kơdư jing tơlơi yôm phăn pioh pơđĭ tui bôh tơhnal pôr pơhing pioh kơ neh wa ƀơi hơdôm bôh plơi pla. Bruă gum hrŏm kơjăp hmâo djru ngă tui klă tơlơi pơhing, pôr pơhing abih bang hơdôm mơta bruă bơwih ƀong – bôh thâo, mơnuih mơnam, rơnuk rơnua plơi pla lŏn ia amăng tơring čar. Mơ̆ng anun, djru yôm phăn amăng bruă pơđĭ tui pran gơgrong tơring čar, hơkrŭ đĭ pran đăo gơnang mơ̆ng mơnuih ƀôn sang amăng tơlơi git gai mơ̆ng hơdôm gưl, gong gai tơring čar, pơtrut pơđĭ kyar bơwih ƀong, bôh thâo, mơnuih mơnam mơ̆ng tơring čar. Jing anih anom hmâo truh 49 djuai ania adơi ayong, tơlơi kiăng hmư̆ hing, pôr pơhing ƀơi Dak Lak prong biă. Yua anun, Khua git gai Ping gah tơring čar Dak Lak ăt rơkâo mơn, pơ̆ anăp anai, Gong phun jua pơhiăp dêh čar Việt Nam pok prong dong hơdôm bôh yôm gum hrom pôr pơhing, lăi pơhing. Amăng anun, kiăng biă tơlơi pơhing kơ bruă pơphun ngă tui hơdôm hơdră pơtrun, hơdră bruă mơ̆ng Ping gah hăng Kơnuk kơna ƀơi tơring čar:

 “Lơm pơphun ngă tui hơdôm hơdră bruă mơ̆ng Kơnuk kơna ƀơi tơring čar lĕ, rơđah đông hmâo hơdôm tơlơi akă gal, hmâo hơdôm hơdră pơkă, hơdră bruă lơm mă yua ƀơi kual Dap Kơdư hmâo hơdôm tơlơi gun. Tơlơi anai pơdah rơđah biă amăng hơdôm jơlan hơdră pơkă mơ̆ng lŏn ia laih anun sa dua mơta tơlơi pơkon. Tơring čar ăt čang rơmang mơn VOV, biă ñu VOV Dap Kơdư khom hmâo hơdôm bôh pơhiăp, kiăng hmâo hơdôm tơlơi lăi đĭ kơtang tit hloh dong hơdôm tơlơi akă gal, ƀudah hơdôm tơlơi gun amăng pơphun pok pơhai ngă tui hơdôm hơdră bruă pioh pơđĭ kyar kual Dap Kơdư”.

Ƀrô djơ̆ mông klah čun ƀơƀiă 3 thun ngă tui jơlan hơdră gum hrŏm hăng tơring čar Dak Lak, Khua phun akha Gong phun jua pơhiăp dêh čar Việt Nam hmâo ƀơk laih Kỷ niệm chương yua kơ bruă pơtui jua pơhiăp kơ ơi Nguyễn Đình Trung, Ding kơna Ping gah dêh čar, Khua git gai Ping gah tơring čar; ơi Phạm Minh Tấn Kơ-iăng Khua git gai Ping gah tơring čar; ơi Phạm Ngọc Nghị, Khua Jơnum min mơnuih ƀôn sang tơring čar; hăng ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar.

Ăt ƀrô djơ̆ tal anai mơn, Gong phun jua pơhiăp dêh čar Việt Nam ƀơk kơ tơring čar Dak Lak 3 bôh sang dô̆ gum hrŏm hơbit hmâo nua 300 klăk prăk./.