Tơdơi kơ 3 thun ngă tui jơlan hơdră ngă hrŏm pôr pơhing, Gong phun jua pơhiăp dêh čar Việt Nam hơmâo čih rơbêh 3.000 tơlơi pơhing, črăn hơdră, pôr pơhing pơhmư̆ nao rai amăng bruă bơwih ƀong, gru grua, mơnuih mơnam, ling tơhan amăng tơring čar Dak Lak. Laih dong, čih hăng pôr pơhing 1.816 jơlan hơdră tơlơi djuai ania ƀiă: hơmâo 908 jơlan hơdră tơlơi djuai ania Êđê hăng 908 jơlan hơdră tơlơi djuai ania M’nông, lĕ dua tơlơi djuai ania ƀiă ƀơi Dak Lak.

Đĭ pơhiăp amăng mông jơnum, Ding kơna Ping gah dêh čar, Khua gong phun jua pơhiăp dêh čar Việt Nam ơi Đỗ Tiến Sỹ pơsit tong, Gong phun jua pơhiăp dêh čar Việt Nam hơmâo ngă hăng amra gum hrŏm hăng tơring čar Dak Lak pơtrut kơtang ƀiă dong amăng bruă pôr pơhing. Amăng anun đing nao hơdôm tơlơi črâo trun, hơdră bruă phara brơi kơ kual Dap kơdư hăng Dak Lak. Khua git gai Ping gah tơring čar Dak Lak ăt rơkâo, pơ anăp anai, Gong phun jua pơhiăp dêh čar Việt Nam tŏ tui pok prong dong hơdôm boh tơhnal ngă hrŏm pôr pơhing.