Khua Gong phun jua pơhiăp dêh čar Việt Nam ơi Đỗ Tiến Sỹ hrŏm hăng hơdôm rơnuk mơnuih čih tơlơi pơhing phrâo lok glăi jơlan ư-ang, pơtŏng sit bruă mă ba jơlan hlâo mơ̆ng VOV amăng bruă pơđĭ kyar bruă čih tơlơi pơhing hơkrŭ. Ơi Đỗ Tiến Sỹ lăi rơđah: Lơm dô̆ hơdip, Khua mir sir Hồ Chí Minh hmâo ha tal 6 wot nao čuă Gong phun jua pơhiăp, pioh glăi lu tơlơi pơtă pơtăn dơlăm.

Djă pioh tơlơi Wa, giăm truh 80 thun rơgao, VOV djă pioh na nao bruă mă ba jơlan hlâo amăng tơlơi pơmin – bôh thâo đưm, gum hrŏm djuai ania găn rơgao rim tal gru grua. Hăng bruă mă bang hyu tơlơi kiăng khăp, tô nao rai khul mơnuih Việt amăng hăng pơ̆ dêh čar arăng, Gong phun jua pơhiăp dêh čar Việt Nam pơtŏng sit anih gơgrong lĕ ƀirô pôr pơhing phun, hăng djru pơjing bruă pôr pơhing rơnuk anai, hăng pran jua ană mơnuih, djru tơlơi pơhiăp kơtang mut amăng bruă pơgang hăng pơđĭ kyar lŏn ia./.