Tui hăng ơi Phạm Đăng Khoa, Khua gơnong bruă pơtô hăng pơjuăt tơring čar Dak Lăk, tơdơi kơ 10 thun ngă tui, bruă ruah čơđai hrăm anih 10 hơmâo lu tơlơi aka ƀu lăp djơ̆ mơn, laih anun ƀu djơ̆ dong tah hăng tơring čar. mrô čơđai sang hră lu tui rim thun, ngă kơ anih hrăm, gơnam yua hrăm hră hăng nai pơtô ƀu djŏp. Hrŏm hăng anun ngui tui kơčăo bruă mơ̆ng Kơnuk kơna kơ “Pơtô pơčrâo brơi hrăm bruă hăng dăp anih hrăm kiăo tui tơlơi rơgơi mơ̆ng ƀing čơđai thun 2018-2025” amra hơmâo năng ai ñu 70% čô čơđai hrăm giong gưl 2 dưi nao hrăm gưl 3. Mrô dŏ glăi hơmâo ƀiă biă mă ñu 30% čơđai hrăm bruă hlao hăng anih pơtô hrăm trung cấp, sơ cấp.

Khă hnun, ƀơi Dak Lăk, ră anai mrô anai dŏ lu (năng ai 90% čơđai hrăm giong gưl 2 mut hrăm gưl 3). Yua hnun, tơring čar kiăng sem lăng hơdră brơi čơđai pơplông hlâo či mut hrăm anih 10, lui hĭ sem lăng hră krăp lăng tơlơi hrăm arăng iâu hok ƀă hră anai.