Pơwơ̆t glăi pơ Tơdrun găn ia krông Sêrêpôk, anih ñu hăng ƀing gŏp tơhan juăt dŏ amăng hrơi blan ngă bruă pok jơlan nao rai, Đại tá Lê Xuân Bá, khua hơđăp Trung đoàn 4 công binh, Sư đoàn 470, Binh đoàn 12 ol kơdol lơ̆m hơdor glăi. Tŭi ñang kơ ƀing gŏp ñu djai, ơi Bá črâo pơƀuh anih găn ia, ñu ră ruai: mơ̆ng akŏ bơyan phang 1973, puih kơđông ñu hơmâo jao bruă pơkra jơlan mơ̆ng jơlan 19 mut nao pơ Dơnung Dap Kơdư, pơhlôm hơmâo jơlan nao tơpă hăng jơlan nao pơ Buôn Ma Thuột. Pơ anai, ñu hăng ƀing gŏp ñu pơkra jơlan mur brơi rơdêh sar nao rai, hăng sa boh tơdrông toa hăng kơdư brơi rơdêh ôtô, tơhan pơgiăng phao kơtuang prong, ling tơhan găn nao ia krông Sêrêpôk. Amăng hrơi blan glăk bơblah kơtang, bruă pok jơlan khŏm hơgŏm, khut khăt kiăo tui tơlơi pơkă “rơbat ƀu hơmâo kru, tơnă hơbai ƀu hơmâo asăp, pơhiăp ƀu hmư̆ jua”.

“Rơdêh sar, rơdêh kam ñong hơmâo jơlan phara. Sa jơlan hơmâo pơkra jơlan mur mơ̆ng hang ia gah anai arăng iâu hang ia gah ngŏ, bơrơdih hang ia arăng iâu gah dơnung. Tơdrun anai prong 6m, glông truh pơ hang ia gah adih lĕ 200m. Ñu lĕ rơ-ưng boh pơtâo dlông biă, anun jing mă rơdêh ƀen nao mă boh pơtâo tuh đĭ, giong anun pơkra kiăng ñu tơpă, tơthơ̆ hnun, jing jơlan brơi rơdêh sar, rwdêh kam ñông nao rai. Tơdơi kơ pơkra giong lĕ hơdôm rơtuh rơdêh sar, rơdêh kam ñông găn nao jơlan mur anai".

Tui hăng tơlơi ơi Bá, tơdrông hơmâo anăn LPP hơmâo pơƀut anăn mơ̆ng hơdôm boh ƀat tô dưm mring, tơdrông hơmâo pơkra mơ̆ng kyâo. Gah yŭ tơdrông hơmâo dăp boh pơtâo pơprong kiăng hơmâo jơlan nao. Ring bruă hơmâo pơkra giong jing brơi khul tơhan, rơdêh sar, rơdêh pơgiăng gơnam nao pơ hơdôm boh tơring čar kual Ngŏ Dơnung dêh čar, tơdơi anai gum blah Bruă blah rơngai lŏn ia Hồ Chí Minh thun 1975.

 Amăng hrơi man pơkra jơlan mur, tơdrông tô nao rai dua bơnah hang ia Sêrêpôk, ayăt blah kơtang biă mă. Hăng pran jua blah ngă khin hơtai, khut khăt pơgang ring bruă pơkra jơlan, 57 čô tơhan mơ̆ng Trung đoàn 4 công binh hăng Tiểu đoàn bộ binh 21 gah Sư đoàn 470 djai drơi ƀơi tơdrun ia. Đại tá Đặng Đình Đường, khua hơđăp Sư đoàn 470 hơdor glăi, amăng hrơi blan anun, pran jua hur har, khin hơtai hăng tơlơi pơmin “djai drơi pô kiăng lŏn ia rơngai” djru ba rim čô tơhan găn rơgao tơnap tap đah mơ̆ng dưi ngă bruă.

“Thâo ayăt blah kơtang tui anun, samơ̆ arăng thâo pơkra jơlan kiăng hơmâo jơlan brơi rơdêh, brơi mơnuih nao blah ayăt. Tơlơi yôm ƀơi anun yơh, anun jing djai drơi pô tŭ mơn ăt ƀu hŭi lơi, ta gir pơgang yah ƀơi ta thâo pơgang. Bơ abih bang ayong adơi ngă tơhan, wơ̆t hăng 57 čô tơhan dŏ glăi pơ anai lĕ ăt pơmin hnun mơn”.

Ăt ƀơi anai mơn, tơdơi kơ hrơi rơngai kual Dơnung, 14 čô tơhan amăng Kông an blah ngă Dak Lăk ( ră anai lĕ Tơhan pơgang guai Dak Lăk) djai drơi amăng rơnuk blah tơhan Pôn Pốt pơgang ba djŏp kual lŏn yôm pơphăn mơ̆ng Lŏn ia.

Găn rơgao giăm 50 thun, truh ră anai, gru đưm dŏ glăi gŏng hlă amăng ia đôč yơh, năng ai 20cm. Mơ̆ng thun 2013 truh ră anai, Tơdrun găn ia krông Sêrêpôk hơmâo pơsit jing Gru đưm yôm pơphăn. Mơ̆ng hrơi anun truh ră anai, pơ anai jing anih yôm biă amăng bruă pơtô glăi gru grua hơkrŭ lŏn ia kơ rơnuk tơdơi. Giăm ƀơi tơdrun ia, sang čih anăn ling tơhan djai pơsăn drơi hơmâo man pơkra hăng jao kơ Puih kơđông tơhan pơgang guai Sêrêpôk lăng ba. Jơlan mơ̆ng tơdrun ia nao pơ Jơlan prong 14C ăt hơmâo pơkra jơlan kơsu hiam, kiăng abih bang thâo nao čuă jơmư, tŭi ñang. Kiăng pơhrup brơi anih anom pơ anai, tơhan pơgang guai Sêrêpôk hơmâo pơkra 2 ring bruă hlăk ai, pla boh troh kah hăng boh mit, boh kruăi mih. Bruă pla kyâo, kih rơmet anih čih anăn tơhan sông kơtang ăt hơmâo ƀing khua, ling tơhan pơgang guai ngă na nao mơn. Thiếu tá Phạm Văn Hiếu, Khua ping gah, ding kơna apăn bruă kơđi čar puih kơđông tơhan pơgang guai Sêrêpôk, Tơhan pơgang guai tơring čar Dak Lăk brơi thâo:

“Jing anom bruă wai lăng guai, amăng anun hơmâo anih gru đưm yôm anai jing ling tơhan lêng kơ hơdor na nao kơ rơnuk ơi yă, adơi ayong ling tơhan, biă ñu lĕ tơhan djai pơsăn drơi kơ lŏn ia. Jing rơnuk tơdơi, kiăo kru rơnuk hlâo, gơmơi, ƀing ngă tơhan lêng kơ thâo pơmin, kơdrưh biă mă, laih anun gơgrong bruă, hrăm na nao kiăng hơmâo tơlơi pơmin kơjăp hloh, gir ngă bruă kiăng kiăo kru ƀing ơi ƀing ayong pơgang ba kơjăp rơnuk rơnua guai lŏn ia rơnuk anai”.

Rơnuk blah ngă rơgao sui laih, samơ̆ gru nam ñu ăt dŏ hơmâo na nao đôč ƀơi tơdrun găn ia Sêrêpôk, jing gru yôm biă mă, anih pơ-ư pơ-ang kơ rơnuk blah ayăt khin hơtai mơ̆ng mơnuih ƀôn sang ta. Anun jing gru kiăng ƀing ta hơdor glăi kơ djŏp tơlơi gum djru, djai drơi kơ lŏn ia mơ̆ng rơnuk ơi yă ta, djai drơi kiăng rơngai, pơlir hơbit lŏn ia./.