VOV4.Jarai - Mơguah lơ 19/9, Grŭp pel ĕp mrô 4 mơng Grŭp črâo ba pơgang pơgăn hưp ƀong kông ngăn, ngă soh dêh čar ta, yua kơ ơi Tô Lâm – Ding kơna Ding jum kơđi čar, Khua Ding jum Kông ang, Kơ-iăng Khua Grŭp črâo ba, ngă khua grŭp hmâo mông mă bruă hăng Grŭp apăn bruă Ping gah tơring čar Gialai pioh lăi pơthâo bôh tơhnal bruă pơgang, pơgăn hưp ƀong kông ngăn, ngă soh ƀơi tơring čar.

Klah čun mông mă bruă Đại tướng Tô Lâm rơkâo, Grŭp apăn bruă Ping gah tơring čar Gialai kơtưn đĭ dong git gai, črâo ba kiăng pơđĭ tui tơlơi pơmin, bruă gơgrong mơng hơdôm gưl ping gah, gong gai tơring čar amăng thâo, tŭ mă, pơsir tơlơi ƀom kiơng, lăi pơhing, rơkâo ƀom đĭ hơdôm kơđi tơlơi hmâo gru nam ngă soh biă ñu đing nao, yôm hloh amăng bruă git gai, črâo ba hơdôm ƀirô apăn bruă thâo tañ hơdôm tơlơi pơhing kơ ngă soh amăng wai lăng lŏn drŏn, kông ngăn dlai tlô, pơgang dlai, pơsir tơpă hơdôm mơnuih, khul mơnuih ngă soh, hrom hăng anun hmâo pơhuĭ, lăi kơtuă, pơgang hlôm hlâo, pơgăn tơlơi ngă soh amăng tơring čar./.

Siu H’ Prăk: Pơblang