Tui hăng hră lăi pơthâo, tơring čar Dak Lak ngă giong laih bruă pơčrong sai tal sa, tŭ ư lăi pơthâo 28 čô mơnuih tơbiă anăn ngă pô pơ ala mơnuih ƀôn sang dêh čar tal XVI mơ̆ng tơring čar, ruah mă 15 čô ngă pô pơ ala sit nik; lăi pơthâo 148 čô mơnuih pơ ala mơnuih ƀôn sang tơring čar, či ruah mă sit nik 84 čô pơ ala, lăi pơthâo 4.300 čô či ruah mă 2,445 čô pô pơ ala mơnuih ƀôn sang gưl să.

Giong jơnum pơčrong sai, tơring čar ăt poblih čih pơhrua anŏ aka ƀu găl, mrô mơnuih tơbiă anăn, khul pơ ala djop mơnuih amăng tơlơi đăo, mơnuih djuai ƀiă, pơ ala djop khul bruă kơđi čar tui tơlơi phiăn pơkă, kiăng ruah hăng tơlơi tơpă, mơnuih ƀôn sang ngă pô či plĕ hră ruah khua. Kiăng pơhlom hơđong kơđi čar, mơnuih mơnam, djop ling tơhan anom bruă kơnuk kơna dăp hơdră tum teč mngă hrŏm tong ten, tŭ mă hră pơar ƀing tơbiă anăn hăng djop bruă mă pơdjơ̆ nao, kiăng pơphun  bruă ruah khua hruaih hloh. Grup krăp lăng mơ̆ng Gơnong dlông čih pioh, bơni tơlơi gir run mơ̆ng tơring čar, hơmâo prăp lui tong ten djơ̆ tơlơi phiăn ƀơi Dak Lak; rơkâo tơring čar ăt kơtưn bruă pơgang hơđong kơđi čar amăng lăm, ngă giong hơdră pơgang tơlơi rơnuk rơnua ƀơi djop anih plĕ hră, kiăng mơnuih ƀôn sang nao plĕ hră ruah tui tơlơi gơñu kiăng tơpă sit nik.