Rơgao 2 thun pok pơhai ngă tui Hră pơtrun 43/2022 mơ̆ng anom bruă khua pơ ala mơnuih ƀôn sang dêh čar ƀơi Dak Lak hơmâo ba glăi boh tŭ yua lăp bơni, djru ngă hrŏ ƀiă tơlơi tơnap kơ mơnuih ƀôn sang, kơ anom bruă sĭ mơdrô, djru kơ tơlơi bơwih ƀong huă rŭ đĭ hăng dưi pơđĭ kyar.

Pơhiăp ƀơi mông jơnum, Kơ-iăng Khua grup pơ ala mơnuih ƀôn sang dêh čar ƀơi Dak Lak, Lê Thị Thanh Xuân bơni tơlơi gir run mơ̆ng jơnum min mơnuih ƀôn sang tơring čar hơmâo pok pơhai hmao kru, tŭ yua, djru kơ tơlơi bơwih ƀong huă, djru sang bruă sĭ mơdrô, mơnuih ƀôn sang găn rơgao hĭ tơlơi tơnap tap, pơđĭ kyar bơwih ƀong huă sĭ mơdrô. Laih dơ̆ng rơkâo jơnum min mơnuih ƀôn sang tơring čar Dak Lak ăt pơtrut tui, pơhrua nao dơ̆ng, ngă pơgiong hră lăi pơthâo djơ̆ tơlơi phiăn pơkă.