Jơnum hơmâo bưp ƀơi anăp ƀơi Jơnum min pơ ala mơnuih ƀôn sang tơring čar Dak Lăk hăng jơnum lăng amăng tivi ƀơi 6 anih jơnum pơtruh nao rai či tơring glông Čư̆ M’gar, Krông Ana, M’Drăk, Ea Kar, Krông Bông, Lăk. Rơbêh 1.200 čô mơnuih hơmâo hmư̆ mông jơnum tal anai. Pơhiăp ƀơi mông jơnum, Khul khua pơ ala mơ̆ng tơring čar Dak Lăk bơni kơ tơlơi pơgôp hiăp sit nik, pơdah tơlơi gơgrong bruă mơ̆ng mơnuih ƀôn sang. Laih dong hơduah tơña kiăng thâo rơđah hloh hơdôm tơlơi mơ̆ mơnuih ƀôn sang lăp đing nao laih anun pơsit hơdôm tơlơi pơgôp hiăp amra hơmâo grup khua mua pơ ala mơnuih ƀôn sang tơring čar hăng djŏp gưl, djŏp anom bruă tum pơƀut glăi, lăi pơthâo kơ anom bruă dưi pơsir, tañ pơsir brơi tui tơlơi phiăn, djơ̆ hăng tơlơi čang rơmang tơlơi kiăng khăp mơ̆ng mơnuih ƀôn sang.

Amăng dua hrơi lơ 30/11 hăng lơ 1/12, Grup khua mua pơ ala mơnuih ƀôn sang tơring čar Dak Nông ăt ngă tui bruă nao bưp mơnuih ruah khua ƀơi să Dak N’Drot tơring glông Dak Mil, să Tâm Thắng tơring glông Čư̆ Jut, să Dak Hoa tơring glông Dak Song hăng phường Quảng Thành plơi prong Gia Nghĩa. Ƀơi mông bưp hăng bơ ră ruai nao rai tơdơi kơ hmư̆ ƀing pơ ala mơnuih ƀôn sang dêh čar lăi pơthâo boh tơhnal jơnum lok 6 khua mua pơ ala tal 15, mơnuih ruah khua pơdah pran jua hok mơak mơ̆n kơ boh tơhnal tŭ yua tal jơnum anai, hăng lăng yôm tơlơi gir run mơ̆ng mơ̆ng ƀing pơ ala mơnuih ƀôn sang tơring čar Dak Nông hơmâo kru rơkâo đĭ lu tơlơi ƀuh sit nik amăng rim hrơi, djơ̆ găl hăng anŏ čang rơmang mơ̆ng mơnuih ruah khua mơ̆n.

Mơnuih ruah khua ƀơi Dak Nông ăt rơkâo đĭ ngă tui klă hloh bruă mă pơgang hơđong tơlơi hơdip mơda mơnuih ƀôn sang, kiăng djru ba hră pơhlôm nua ia jrao kơ mơnuih ƀôn sang tơnap tap, biă mă ñu jơlan hơdră pơđĭ prăk blan, prăk djru kơ mơnuih mă bruă gah ia jrao, bruă pơtô hrăm, hăng pơsir tơlơi kơƀah ia jrao pơjrao duăm ruă kơƀah vaccine tlâ̆o pơgang kơ čơđai muai.