Să Lạc Dương, tơring čar Lâm Đồng dưi pơjing hluai tui pơmut hrŏm 3 bôh să: Dă Sar, Dă Nhim hăng Dă Chais gah tơring glông Lạc Dương hơđăp. Anai lĕ să hmâo lŏn prong hloh tơring čar, giăm truh 830km2, mrô mơnuih giăm truh 15.000 čô mơnuih, hăng abih bang kah hăng abih bang lĕ djuai ania K’ho. Să hmâo 30 Grŭp Ping gah hăng rơbêh kơ 500 čô mơnuih ping gah. Ơi Ya Tiong, Khua git gai Ping gah să Lạc Dương, brơi thâo, amăng hơdôm hrơi prăp lui hăng ba gong gai plơi pla mut amăng bruă mă mơ̆ng 1/7, să biă ñu đing nao, lăng nao bruă ngă tui phiăn juăt mơ̆ng hlâo gum hrŏm hơbit amăng mơnuih apăn bruă hăng mơnuih ƀôn sang:

“Blung a lĕ amăng ƀirô pơlitt hơbit, gum hrŏm hơbit tơlơi anun mơ̆ng đut tơhnal pioh git gai bruă mă. Lơm lơ 2/7 mơtăm hmâo pơjing hơdôm bôh ƀirô bơdjơ̆ nao hmâo tơlơi dưi mơ̆ng gưl să. Neh wa ƀơi anai djuai ania hơđăp hmâo 86%, kual lŏn prong, mơnuih ƀôn sang dô̆ raih daih ƀing gơmơi gơgrong hlâo mơ̆ng phun neh wa ƀơi anai gum hrŏm hơbit, mut sa pran”.

Tơdơi kơ pơmut hrŏm 3 bôh tơring čar Lâm Đồng, Dak Nông hăng Bình Thuận, tơring čar Lâm Đồng phrâo tum pơƀut hơdôm bôh than pioh lu bruă dưi pơđĭ kyar pơplih phrâo, ba jơlan hlâo, kah hăng tuai čuă ngui glai klô – ia rơsĭ Đà Lạt – Phan Thiết; djă pioh  bauxite prong hloh đơ đam dêh čar hăng năng ai ñu 5,4 klai tơn pơsơi pơsă phrâo mă; hơdôm hlung ia jâo hyuh hăng mrô djă pioh lu; hang ia rơsĭ ataih 192 km…

Kiăng tañ wai lăng, git gai, mă yua đut hlah anô̆ gal, tơhnal gal ƀơi sa anih anom prong mơ̆ng glai trun pơ̆ ia rơsĭ, tơring čar Lâm Đồng pơsit jơlan mă bruă gong gai 2 gưl khom mă bruă hluh gah, ba glăi tŭ yua, bôh tơhnal. Ơi Nguyễn Hồng Hải, Kơ-iăng Khua Jơnum min mơnuih ƀôn sang tơring čar Lâm Đồng, brơi thâo, tơlơi anai kơnong kơ dưi ngă tui truh kih lơm hmâo tơlơi gum hrŏm hơbit kơjăp phik:

“Ƀing ta glăk pơplih bruă anun ƀu dưi thâo abih mơn. Blung a gum hrŏm hơbit mơ̆ gum hrŏm ngă giong bruă jao mơ̆ng tơring čar phrâo. Tơdah ƀing ta ƀu gum hrŏm hơbit thơ ƀu dưi ngă ôh. Ƀing ta khom gum tơngan hrŏm hơdôm bruă ngă tui mơtăm kiăng đing nao pok pơhai”.

Amăng lu bruă mơ̆ng sa bôh tơring čar phrâo dưi pơjing mơ̆ng bruă pơmut hrŏm 3 bôh tơring čar, thun anai tơring čar Lâm Đồng phrâo ăt pơsit pran jua dưi ngă tơhnal pơkă pơđĭ kyar bơwih ƀong hloh kơ 8% hăng đĭ kyar 2 mrô hăng lu hloh pơ̆ anăp anai. Kiăng dưi ngă tơlơi anai, mơnuih apăn bruă hăng mơnuih ƀôn sang tơring čar Lâm Đồng glăk yơr đĭ pran jua gum hrŏm hơbit kah hăng tơlơi Wa Hồ pơtô pioh pơjing pran kơtang prong, pơdŏng tơring čar Lâm Đồng pơđĭ kyar tañ hăng kơjăp phik./.