Mơnuih djuai ania ƀiă ƀơi kual Dap kơdư hơmâo gru grua gum pơgôp, tui kač mang kơdong glăi ayăt, hăng ĕp pơkiăo đuăi Fulro. Lơm hmư̆ hing ruă ngă rung răng ƀơi Dak Lak, ƀing tha plơi ƀơi kual Dap kơdư lêng jăm ƀuah soh, hăng iâu pơthưr ană plơi pla mut hrŏm kơdong glăi ƀing ngă sat. Tha plơi Kra Jan Ha Xuyên (djuai ania K’ho), dŏ amăng plơi Dă Tế, să Dă Mrông, tơring glông Đam Rông, tơring čar Lâm Đồng hlâo anun ăt hơmâo tơhan Fulro pơčut pơčao dŏ hơdip amăng glai 12 thun, ñu thâo tơlơi tơnap tap lơm ngă soh glăi.

“Đưm hlâo adih hơdip amăng glai rưng 12 thun rin rơpa, kơnong hyu pĕ añăm tam amăng glai kiăng hơdip rĭm hrơi, dju djuam duam ruă dong. Lơm pot glăi hơmâo Ping gah, Kơnuk kơna, gong gai ăt ngă gêh gal brơi kơ kâo hơmâo bruă, ană bă dưi hrăm hră. Yua hơmâo Ping gah, Kơnuk kơna djru brơi bruă mă, ră anai sang anŏ hơđong, hơmâo rơdêh đuăi nao rai, tơlơi hơdip jơnap tui yơh. Kâo hơmâo sa, dua tơlơi pơtă kơ mơnuih djuai ania ƀiă anăm kiăo tui bruă kâo ngă hlâo adih, kâo kiăo tui Fulro 12 thun ƀu hơmâo tơlơi dưi hơget ôh, yua anun kâo pot glăi hơmâo Ping gah, Kơnuk kơna djru brơi. Mơng anun abih bang kiăng hmư̆ tui Ping gah, Kơnuk kơna, anăm hmư̆ tui arăng pơčut pơčao kiăng ngă soh… anai lĕ tơlơi kâo kiăng pơtă pơtăn brơi abih bang mơnuih”.

Bơ̆ ơi Y Đoan (djuai ania Bơnông) Khua Jơnum min djop djuai ania Ƀon R’Bút, să Quảng Sơn, tơring glông Dak Glong, tơring čar Dak Nông lĕ mưn ƀuh: găn rơgao djop tơlơi tơnap, lŏn ia mơ̆ng hmâo tơlơi rơngai, rơnuk rơnua pioh neh wa hơđong bơwih ƀong huă, pơđĭ kyar sang anô̆. Yua anun, neh wa amăng plơi ƀom đĭ kơtang biă bruă ngă kah ania pơpha djuai, rung răng amăng plơi pla, ƀơi anăp ngă bơdjơ̆ nao tơlơi hơdip mơda mơnuih ƀôn sang:

“Tơnap tap biă mă kah mơ̆ng dưi tlaih rơngai, rơnuk rơnua pioh hơđong bơwih ƀong huă yua anun neh wa ƀơi ƀôn ta ƀom đĭ hơdôm tơlơi ngă rung răng kah hăng ƀơi Čư̆ Kuiñ, Dak Lak. Ƀơi ƀôn ƀing gơmơi hmâo jơnum laih na nao pioh lăi pơhing kơ neh wa gum hrŏm hơbit, ƀu hmư̆ tui ƀing sat, pơhlôm hlâo huĭ hmâo tơlơi rung răng”.