Tơring čar Dak Lăk man pơdong Sang hră đom lăm kơnuk kơna čem rông gưl Sa hăng Dua ƀơi să Ea Bung. Sang hră hơmâo prăk man pơdong 250 klai, mă mơ̆ng Kơnuk kơna wơ̆t hăng prăk mơ̆ng tơring čar, man pơdong ƀơi đam lŏn prong năng ai 6ha ƀơi thôn 1. Lơ̆m ngă giong, sang hră djru ba rơbêh 1.300 čô čơđai sang hră jing ană bă djuai ania ƀiă pơ guai dêh čar dưi hrăm hră, ƀong huă đih pơdơi klă hloh. Să Ea Bung hơmâo akŏ pơjing yua pơmut să Ea Bung hăng Ya Tơ Mốt (hơđăp), kual anai prong biă, plơi pla dŏ raih daih, bruă nao rai hrăm hră mơ̆ng ƀing čơđai, biă ñu amăng bơyan hơjan, dŏ tơnap biă mă. Bruă man pơdong sang hră dua gưl čang rơmang pơđĭ tui anŏ klă bruă pơtô hrăm pơ guai dêh čar.

Tơring čar Lâm Đồng pơphun man pơdong 3 boh sang hră dua gưl ƀơi hơdôm să ter guai dêh čar anun lĕ Tuy Đức, Thuận Hạnh hăng Dak Wil. Klâo boh sang hră đôm lăm dua gưl anai, rơnoh prăk tuh pơ alin truh 675 klai prăk. Hnơ̆ng hiam prong sang hră anai man pơdong gưl pơkă mrô III, ngă sang dlông tal mơ̆ng 1 tal truh 3 tal pơngŏ. Thun blan man pơdong, mơ̆ng blan 3/2026 truh blan 8/2027. Laih ngă giong, ba yua djop sang hră anai, amra čơkă 4000 čô čơđai sang hră mơ̆ng gưl sa hăng gưl dua, jing ană bă mơnuih djuai ƀiă dŏ amăng kual giăm guai dêh čar.

Tơring čar Quảng Ngãi ngă yang lŏn, pơphun man pơdong Sang hră đom lăm hrăm hră ƀong huă đih pơdơi Gưl sa hăng gưl dua ƀơi 5 boh să gah guai anun lĕ: Bờ Y, Ia Tơi, Ia Đal, Đăk Long hăng Đăk Plô. Prăk tuh pơ alin man 5 boh sang hră rơbêh kơ 1.100 klai. Rim boh sang hră hơmâo man pơdong ƀơi 5 ha lŏn, dưi brơi 700 truh 1.600 čô čơđai hrăm, kiăo tui tơlơi hơmâo mơ̆ng rim boh tơring mơn. Kơčăo bruă hơmâo pok pơhai tui sang hră đom lăm pơlir dua gưl hrăm gưl sa hăng dua, nao hrŏm hăng dăp glăi sang hră, hrŏ ƀiă sang hră pơdong raih daih ƀơi hơdôm boh plơi, akŏ pơdong sang hră pơƀut ha anih. Tơring čar Quảng Ngãi hơmâo tuh pơ alin man pơdong 9 boh sang hră kơnuk kơna čem rông ană bă djuai ania ƀiă gưl sa hăng gưl dua ƀơi hơdôm boh să giăm guai. Tal sa, tơring čar man pơdong 4 boh sang hră ƀơi să Rờ Kơi, Mô Rai, Sa Loong hăng Dục Nông, him lăng man giong amăng blan 7/2026. Abih tih 5 boh sang hră hơmâo man amăng tal dua anai, him lăng man giong amăng blan 8/2027.