Tơdơi kơ nao sem lăng ƀơi anăp či graih rơdêh treng Đồng Đăng, Lạng Sơn, Khua git gai ping gah ơi Tô Lâm lăi pơtong, bruă ngă hrŏm plah wah Việt Nam hăng Khač amăng bruă pơkra ming jơlan rơdêh treng lĕ tơlơi či kiăng biă mă hăng anŏ gêh găl, tơdah dưi ngă klă, wai lăng djơ̆ lăp, anai lĕ sa amăng hơdôm anih ngă hrŏm tŭ yua sit nik, ba glăi tơlơi tŭ yua mă bruă kơ dua bơnah lu thun pơ anăp adih.

Hrơi blan pơ anăp, kiăng pok pơhai tŭ yua hloh bruă tuh pơ alin čuk pơkra jơlan rơdêh treng, Khua git gai ping gah ơi Tô Lăi lĕ, kiăng pơsir tơlơi jŭ yap, ĕp prăk kăk tuh pơ alin, jak iâu pơgôp prăk kăk hăng lu khul, hơdră ngă hrŏm. Ăt kơđiăng hŭi kơ truh mông ngă giong jơlan glông, hră pơar jŭ yap tla prăk kăk sa bơnah, Khua git gai ping gah pơtrun hiăp brơi pơđĭ kyar jơlan rơdêh treng hrŏm hăng bruă pơkă lăng man pơdong ƀut sang măi tuh tia pơkra ming, man pơdong plơi prong, anih anom logistics hăng ƀut sang măi pơdong ter jơlan anih bơwih ƀong huă, kiăng pơjing rai gơnam sĭ mơdrô hơmâo rơnoh hơđong phrâo hăng pơđĭ tui rơnoh pơhrui glăi amăng dêh čar.