Hăng akŏ tơlơi jơnum “Djă pioh gru grua rơbâo thun akŏ pơjing lŏn ia hăng khin hơtai; gum pơgôp man pơdong ping gah rơgoh tơpă, kơjăp kơtang, nao hlâo, pơblih phrâo rơnuk hrưn đĭ pô; pơđĭ kyar plơi prong jưh jom thâo rơgơi, phrâo hloh, hyuk hyak mơak klă”, mơguah lơ 16/10, hơmâo pơphun jơnum sit nik ruah khua ping gah ƀôn prong Hà Nội tal XVIII, rơwang bruă thun 2025-2030 hăng hơmâo 550 čô khua pơ ala nao jơnum. Tui hăng hră lăi pơthâo bruă kơđi čar ƀơi mông jơnum, rơwang bruă laih rơgao tơhnal pơkă kơ bruă mă dưi ngă djop hăng lu hloh rơnoh pơkă, tơlơi bơwih ƀong huă ƀơi plơi prong jưh jom pơđĭ kyar na nao hăng rơnoh pơkă thun tơdơi lu hloh thun hlâo kơ anun, đĭ hloh mơ̆n pơkă dưm dưm amăng dêh čar. Pơhiăp git gai jơnum, Khua git gai ping gah ơi Tô Lâm lăi pơtong, Lŏn ia ta, plơi prong jưh jom ta hlăk yak nao amăng rơnuk pơđĭ kyar phrâo mơ̆ng djuai ania hăng tơlơi gêh găl, mông gêh găl laih anun ăt hơmâo lu tơlơi lông lăng hơmâo hrŏm mơ̆n. Khua git gai ping gah pơčrâo brơi 7 hơdră či ngă, bruă mă kiăng ping gah ƀôn prong Hà Nội pơtum git gai hăng pơčrâo bruă amăng rơwang bruă pơ anăp.

Khua git gai ping gah ơi Tô Lâm pơtrun hiăp, Hà Nội khom akŏ pơdong glăi kah hăng sa boh “Ƀôn prong kơhnâo rơbâo thun-djă pioh gru grua hiam-pơčeh phrâo” anăp nao sa boh “Plơi prong jưh jom thâo rơgơi-phrâo hloh-hơđong kơjăp” hăng tơlơi pơmin ia rơgơi phrâo rơnuk anai hăng kơnuih hing ang amăng rŏng lŏn tơnah.

Tui hăng tơlơi kiăng anun, akŏ pơdong “3 akiăng pơčeh phrâo” ba yua đut tơhnal rơnoh yom gru grua đưm, tơlơi kơhnâo ră anai hăng ia rơgơi phrâo, ba Hà Nội jing plơi prong pơtum rơnoh yom mơ̆ng đưm đă, ră anai laih anun dĭ da gla kơñ.