VOV4.Jarai - Mơguah lơ 6/10, ƀon prong Hà Nội pơphun pơkra jơlan mur, jơlan gah rơgup lŏn ƀơi jơlan bĕ gah rơngiao ƀon prong 2.5 - jơlan Giải Phóng (kuâ̆n Hoàng Mai). Kơčăo bruă anai hơmâo nua 780 klai prăk, mă mơng prăk ƀon prong Hà Nội. Jơlan mur ƀơi črăn jơlan bĕ ƀon prong 2.5 - Giải Phóng hơmâo 4 glông rơdêh đuăi, glông năng ai 460m, amăng anun luh amăng rơgup lŏn glông 140m, luh gah rơngiao glông 320m. Jơlan mur pơphun mơng jơlan bĕ ƀon prong 2,5, glông jơlan Đầm Hồng - Jơlan 1A.

Jơlan mur ƀơi jơlan bĕ 2.5 - Giải Phóng hơmâo prăk pơkra giăm 800 klai prăk

Pơhiăp ƀơi mông pơkra jơlan, ơi Trần Sỹ Thanh, Khua Jơnum min mơnuih ƀon sang ƀon prong Hà Nội lăi, Kơčăo bruă pơkra jơlan mur tô nao rai Jơlan bĕ gah rơngiao ƀon prong 2,5 hăng jơlan Giải Phóng hơmâo pơsit jing bruă yôm phun mơng ƀon prong rơwang thun 2021-2025; kiăng plai ƀiă dun rơdêh, pơkra jơlan kiăng phrâo hloh, nao rai amuñ hloh tui hăng hơdră bruă čuk pơkra hơmâo Khua dêh čar pơsit brơi. Yua hnun, bruă man pơkra jơlan jing bruă kiăng ngă laih anun khŏm ngă tañ.

Siu H’Mai: Pơblang