Amăng lan sang mơtah rơ-ơ̆ pơ̆ Puih kơđông pơgang guai dêh čar Sêrêpôk, pơ̆ să Krông Na, tơring glông Buôn Đôn, tơring čar Dak Lak, gŏng kut Wa Hồ hăng ling tơhan pơgang guai dêh čar lăng kơdrưh mơ̆ ƀuh juăt biă. Đại úy Phạm Văn Thức, Kơ-iăng Khua apăn bruă kơđi čar Puih kơđông pơgang guai dêh čar Sêrêpôk brơi thâo, tơdơi kơ 2 blan pơdŏng, ring bruă mă yua djơ̆ tal hơdor glăi 134 thun hrơi tơkeng Khua mir sir Hồ Chí Minh jai tŭ yua biă:

 “Lơm hmâo ring bruă amăng glông bruă pơphun hơdôm hơdră pơkă bôh thâo mơ̆ng puih kơđông hmâo dong sa ring bruă yôm phăn. Hmâo bôh tŭ yua prong, ƀu kơnong kơ gah bôh thâo pơdŏng gŏng rup đôč ôh mơ̆ ñu dô̆ pơtô phiăn juăt dơlăm kơ hơdôm rơnuk mơnuih apăn bruă tơhan, ling tơhan Puih kơđông pơgang guai dêh čar Sêrêpôk, sa gru pơđom pioh yôm phăn pơtŏng sit tơlơi tŭ mă hăng ngă tui phiăn juăt sông kơtang mơ̆ng khul ling tơhan pơgang guai dêh čar”.

Dong mơ̆ng thun 2019 truh ră anai, hlăk ai Dak Lak hmâo pơsur lu ngăn rơnoh, gum hrŏm hăng lu anom pơdŏng 4 ring bruă gŏng kut Wa Hồ hăng ling tơhan pơgang guai dêh čar, ƀơi lan hơdôm puih kơđông pơgang guai dêh čar tơring čar. Ƀơi yŭ tơkai gŏng kut čih 4 glông pơtưh mơ̆ng Wa Hồ brơi kơ ƀing apăn bruă tơhan, ling tơhan pơgang guai dêh čar:  “Non xanh nước biếc trùng trùng/ Giữ gìn Tổ quốc ta không ngại ngùng gian lao/ Núi cao sự nghiệp càng cao/ Biển sâu chí khí ta so vào càng sâu”.

Thâo dơlăm kơ tơlơi pơtô mơ̆ng Wa, hơdôm rơnuk apăn bruă tơhan, ling tơhan pơgang guai dêh čar ƀơi tơring čar Dak Lak gir run na nao yak rơgao tơlơi tơnap pioh ngă giong klă bruă jao. Thượng uý Y Son Niê Êban, ƀơi Puih kơđông Yok Đôn, să Krông Na, tơring glông Buôn Đôn lăi pơthâo:

 “Wa Hồ jing pô pơdŏng khul Ling tơhan pơgang guai dêh čar, hlâo kơ anun lĕ khul ling tơhan mơnuih ƀôn sang. Wa ăt hmâo ƀơi anăp nao čuă pơdŏng Sang hră pơtô bruă Pơgang lŏn ia. Tơlơi anun kiăng lăi yôm phăn biă, pơtă ƀing apăn bruă tơhan, ling tơhan ăt kah hăng mơnuih amăng khul hlăk ai khom hrăm tui na nao hăng ngă tui tơlơi pơmin, pran jua, kơnuih Hồ Chí Minh”.

Tui hăng Đại úy Nguyễn Bá Giáp, Pô djru bruă pơhrăm bruă pơgang bruă kơđi čar, Ling tơhan pơgang guai dêh čar tơring čar Dak Lak, gru rup Wa Hồ jao păt lŏn kơ ling tơhan jing tơlơi pơtă ƀing tơhan pơgang guai dêh čar khom lăng yôm, pơpŭ đĭ rim črăn lŏn guai dêh čar.

 “Anai ăt lĕ sa amăng hơdôm gru than ăt kah hăng tơlơi pơtŏng sit pô lŏn ia ƀơi rim črăn lŏn hăng pơtă kơ hơdôm rơnuk mơ̆ng mơnuih apăn bruă tơhan, ling tơhan pơgang guai dêh čar ngă giong prong bruă jao, kơjăp tơngan djă phao pơgang lŏn drŏn mơ̆ng Lŏn ia”.

Ring bruă Gŏng kut Wa Hồ hăng ling tơhan pơgang guai dêh čar hmâo ba tơbiă ƀơi hơdôm bôh puih kơđông lĕ bôh than mơ̆ng tơlơi gum tơngan hrŏm mơ̆ng khul hlăk ai tơdăm dra amăng tơring čar Dak Lak. Amai H’ Giang Niê, Khua git gai Khul hlăk ai tơring čar Dak Lak brơi thâo, anai ăt lĕ bruă ngă djru pơtô juăt phiăn juăt kơ rơnuk hlăk ai.

 “Ƀing gơmơi pơdŏng gŏng kut Wa Hồ hăng Ling tơhan pơgang guai dêh čar lĕ, pioh ƀing gơyut hlăk ai, tơdăm dra lơm mut ƀơi guai dêh čar amra hmâo tal pioh lăi pơthâo kơ kual guai, lăi pơthâo kơ tơlơi pơmin, pran jua, kơnuih Hồ Chí Minh, lăi kơ ling tơhan pơgang guai dêh čar hăng anun ăt lĕ pran pơsur prong prin pioh kơ mơnuih apăn bruă tơhan, ling tơhan lơm hmâo gŏng kut ƀơi anai. Kah hăng Wa Hồ ăt gum hrŏm na nao mơn hăng ƀing apăn bruă tơhan, ling tơhan ƀơi glông guai dêh čar”.

Gŏng kut “Wa Hồ hăng ling tơhan pơgang guai dêh čar” hmâo jing laih kông ngăn pran jua mơ̆ng khul ling tơhan, hmâo anô̆ yôm gah bôh thâo pơkra rup prong biă, djă pioh dơlăm gru rup Wa Hồ hăng ling tơhan pơgang guai dêh čar, pơdah tơlơi lăng ba prong prin mơ̆ng Ping gah, Wa Hồ pioh kơ bruă pơgang pô lŏn ia, rơnuk rơnua guai dêh čar hăng mơnuih apăn bruă tơhan, ling tơhan pơgang guai dêh čar. Gŏng kut “Wa Hồ hăng ling tơhan pơgang guai dêh čar” ƀơi kual guai dêh čar tơring čar Dak Lak jing laih kông ngăn pran jua, djru rim mơnuih apăn bruă tơhan, ling tơhan hrăm tui klă hăng ngă tui gru hiam pran jua, kơnuih Hồ Chí Minh, ngă tui phiăn juăt ơi yă ta nao hlâo pioh pơgang, pơdŏng hăng pơđĭ kyar plơi pla./.