Ƀơi tơdron lăk Chiến Thắng (phường Quy Nhơn), tơring čar Gia Lai pơphun mông jao, tŭ mă tơhan thun 2026 amăng hrơi mông hur har mơ-ak. Mông ngă lơphet hơmâo Ding kơna Ding jum kơđi čar, Khua ding jum pơtom hiăp Lê Hoài Trung; Thượng tướng Trương Thiên Tô, Kơ-iăng Khua anom bruă kơđi čar ling tơhan Việt Nam; hrŏm hăng khua mua tơring čar, ƀing apăn bruă, ling tơhan hăng lu mơnuih ƀôn sang.

Thun 2026, tơring čar Gia Lai hơmâo giăm 5.700 čô mơnuih mut ngă tơhan. Bruă ruah hăng iâu pơmut ngă tơhan hơmâo pok pơhai klă hloh, djơ̆ tơlơi pơkă, pơhlôm rơđah rơđông, ngă pô, djơ̆ hơnong pơkă, hrưn đĭ klă ƀiă. Mông jao, tŭ mă tơhan thun 2026 ƀơi Gia Lai jing hrơi jơnum ngui mơng hlăk ai amăng tơring čar, tŏ tui pơtrut kiăng ƀing tơhan phrâo kjăp pran nao ngă tơhan, pơgôp pơjing hăng wai pơgang lŏn ia ta.

Mơak hrŏm Hrơi abih bang nao ngă tơhan, giăm 5.500 čô hlăk ai mơ̆ng tơring čar Dak Lăk nao ngă tơhan, ngă bruă jao yom biă mơ̆ng Lŏn ia ta. Ƀơi 15 anih jao čơkă tơhan mơ̆ng hơdôm kual pơhlom pơgang amăng tơring čar, bruă čơkă tơhan hơmâo ngă kơdrưh, yom, dik dak mơak, samơ̆ ăt hơmâo tơlơi ngă ol kơdol pran jua.

Thun anai, Dak Lăk hơmâo 4.600 čô mơnuih ngă tơhan hăng 849 čô ngă Kông an mơnuih ƀôn sang. Anŏ klă, tơlơi hrăm mơ̆ng ƀing phrâo ngă tơhan ƀơi Dak Lăk thun anai hơmâo đĭ tui mơn, hăng giăm 330 čô hlăk ai hrăm gưl prong, găp ƀrô hăng gưl anet ƀiă.

Tơring čar Lâm Đồng pơphun ha wŏt hrơi jao, tŭ mă tơhan thun 2026 ƀơi 12 anih amăng tơring čar, hơmâo rơbêh 4.600 čô mơnuih nao ngă bruă yôm amăng lŏn ia ta. Thun anai, hơnong pơkă jao, tŭ mă tơhan amăng tơring čar Lâm Đồng lĕ 4.607 čô mơnuih.

Ƀing hlăk ai djơ̆ lêng kơ pơhlôm hơnong pơkă kơđi čar, gru hơdip hiam, thâo hră, găng añrăng; lu mơnuih hrăm abih gưl prong, cao đẳng, pơgôp hrưn đĭ klă bruă ĕp pơmut. Bruă ruah mơnuih ƀôn sang nao ngă tơhan hơmâo pok pơhai kjăp, ngă pô, tơpă, tong ten; bruă ĕp lăng glăi, ĕp pơmut, khăm brơi hơmâo pơphun klă hloh, djơ̆ tơlơi pơkă.

Amăng hrơi mông kơdrưh, yom, ol kơdol pran jua, hơdôm boh tơring amăng Khánh Hòa pơphun jơnum jao čơkă tơhan thun 2026, ba nao 3.573 čô hlăk ai hơmâo ruah tong ten či nao ngă tơhan. Thun anai, ƀing tơhan ƀơi Khánh Hòa hơmâo ba nao lu kah hăng: Lữ đoàn 957 (Tơhan ia rơsĭ kual 4), Sang hră pơtô tơhan rơdêh por, Sư đoàn tơhan rơdêh por pơgang rơngit adai 377, Sư đoàn 2, Sư đoàn 305, hrŏm hăng Anom bruă khua git gai tơhan tơring čar, Kông an tơring čar hăng Anom bruă khua git gai tơhan pơgang guai tơring čar.

Kiăng pơhlom anŏ klă bruă ruah tơhan, hrơi blan rơgao, anom bruă tơhan djŏp gưl ngă hrŏm hăng ping gah, gong gai, Jơnum min djŏp djuai ania mơnuih mơnam hăng khul grup pôr pơhing Tơlơi phiăn nao ngă tơhan; wai lăng kjăp mrô mơnuih amăng hnưr thun nao ngă tơhan; sem lăng tơlơi pơmin kơđi čar, ngă tui djŏp tơlơi djru hăng hlăk ai nao ngă tơhan.