VOV4.Jarai - Laih rơgao, Khul hlăk ai rơnuk Hồ Chí Minh ƀơi sa, dua boh tơring čar amăng kual Dap kơdư pơphun jơnum rơwang thun 2022-2027. Mơng anun brơi ƀuh, rơwang laih rơgao, bruă mă amăng Khul hăng hơdôm tal pơphun bruă kơ hlăk ai čơđai amăng kual ba glăi lu tơlơi hiam klă, hăng lu ring bruă, bruă mă sit nik ƀơi rĭm boh ƀon lan.

Tui hră lăi pơthâo amăng Jơnum khul hlăk ai rơnuk Hồ Chí Minh tơring čar Gia Lai tal XV, rơwang thun laih rơgao, hlăk ai amăng tơring čar hơmâo pok pơhai lu bruă mă sit nik. Anun lĕ “Hlăk ai djru amăng bơyan pơdơi prong”, “Ngă pơplih tơlơi pơmĭn, bruă mă klă amăng kual mơnuih djuai ania ƀiă kiăng ƀơƀrư̆ hrưn đĭ pơklaih mơng ƀun rin hơđong kjăp”, “Hlăk ai tơring čar Gia Lai gum tơngan hrŏm pơgang klin kheng”. Mơng anun, ngă tui pran kơtang amăng bruă gum djru mơng hlăk ai.

Jơnum khul hlăk ai rơnuk Hồ Chí Minh tơring čar Gia Lai tal XV

Ƀrô tal anai, Khul apăn bruă hlăk ai tơring čar Gia Lai hơmâo pơphun jơlan hơdră pơpŭ bơni djop khul grup, ƀing mơnuih thâo rơgơi kơ bruă amăng Khul hăng bruă mă mơng hlăk ai čơđai rơwang thun 2017-2022. Sit biă ñu, hơmâo 27 čô mơnuih hăng 28 boh khul grup; Khua Jơnum min mơnuih ƀon sang tơring čar Gia Lai jao hră pơpŭ brơi 5 khul grup hăng 10 čô mơnuih, hơmâo bruă mă truh kih kơ bruă amăng Khul hăng bruă mă mơng hlăk ai čơđai. Ayong Lê Thế Đô, Khua khul hlăk ai tơring glông Čư̆ Prông hơmâo Jơnum min mơnuih ƀon sang tơring čar Gia Lai jao hră pơpŭ, ñu brơi thâo:

“Amăng rơwang thun 2017-2022 hơmâo lu tơlơi tơnap tap, sit biă ñu lĕ klin kheng, samơ̆ tơlơi gir run abih pran jua mơng hlăk ai tơring čar Gia Lai hơmâo lu bruă mă truh kih kơ bruă amăng Khul hăng bruă jao mơng hlăk ai čơđai. Hrơi anai kâo pô hơmâo arăng pơpŭ lĕ mơnuih apăn bruă amăng khul hơmâo arăng pơpŭ kâo ăt hur har hok mơ-ak biă mă, hăng lăng anai lĕ tơlơi pơtrut kiăng gir run, gum tơngan hrŏm kơ bruă amăng khul hăng bruă mă mơng hlăk ai čơđai amăng tơring čar jai hrơi đĭ tui”.

Hăng tơlơi jak iâu “Gum pơgôp - ba jơlan hlâo - hur har - pơčeh phrâo - hrưn đĭ”, Jơnum hlăk ai rơnuk Hồ Chí Minh tơring čar Gia Lai tal XV ba tơbiă 13 hơnong pơkă akŏ phun amăng rơwang thun 2022-2027. Sa amăng hơdôm boh tơhnal lĕ ngă tui truh kih hơdôm hơbô̆ bruă, hơdră gum djru brơi hlăk ai drơi jăn ƀu klă, ƀun rin; tŏ ngă tui hơdôm bruă hiam amăng gum djru ană mơnuih, nao djru tơl ƀon lan kiăng pơgôp pơhrŏ trun ƀun rin hăng man pơdong plơi pla phrâo ƀơi ƀon lan. Ayong Lê Trọng Phúc, Khua khul hlăk ai tơring glông Đức Cơ brơi thâo:

“Čang rơmang hăng hơdôm tal pơphun bruă mă mơng hlăk ai hăng hơdôm jơlan hơdră gum hrŏm hlăk ai, sit biă ñu lĕ pơphun bruă mă kiăng ngă gêh gal brơi hlăk ai dưi hrưn đĭ hăng thâo rơgơi amăng bruă mă. Čang rơmang ƀing hlăk ai rơgơi, mă bruă abih pran jua, ba truh bruă mă mơng khul hăng bruă mă mơng hlăk ai amăng tơring čar jai hrơi pơđĭ kyar”.

Dak Lak pơpŭ 25 ring bruă hăng 34 čô mơnuih apăn bruă ba gru

Kar kăi tui anun mơn, amăng rơwang hrơi tơjuh laih rơgao, Khul hlăk ai rơnuk Hồ Chí Minh tơring čar Dak Lak ăt pơphun Jơnum khul hlăk ai tal 12, rơwang thun 2022-2027. Anŏ pơđŏm glăi amăng 5 thun laih rơgao mơng hlăk ai tơring čar Dak Lak hơmâo ngă pơgiong 6.000 ring bruă, hơdôm bruă jao brơi hlăk ai hăng abih tih rơnoh prăk mă yua giăm 97 klai 500 klăk prăk. Ƀing hlăk ai amăng Khul djop gưl lêng djă pioh pran jua mă bruă gơgrong hloh, ba gru, ba jơlan hlâo, hur har amăng bruă mă, abih pran yua kơ hlăk ai, jing ƀing mơnuih akŏ črâo ba bruă pơplông khăp kơ lŏn ia mơng hlăk ai. Ƀrô tal anai, Khul hlăk ai tơring čar Dak Lak hơmâo pơpŭ 25 ring bruă hlăk ai hăng 34 čô mơnuih apăn bruă amăng Khul ba gru rơwang thun 2017-2022. Amai Lương Thị Nga, Khua khul hlăk ai să Ia Rvê, tơring glông Ea Sup, hơmâo arăng pơpŭ amăng tal anai, ñu brơi thâo:

“Kâo pô hur har hok mơ-ak biă mă. Dua dong lĕ kâo pơ-ư pơ-ang hăng bưng băi hơmâo arăng pơpŭ hăng čang rơmang amăng rơwang thun pơ anăp hăng amăng hrơi blan pơ anăp, kâo pô amra gir run ƀiă dong, gir run kiăng kơ djơ̆ hăng hră pơpŭ mơ̆ kâo phrâo hơmâo arăng jao, kiăng tum pơƀut hlăk ai, pơmut hlăk ai amăng khul grup. Anai lĕ bruă mă, tơlơi gir run mơ̆ ƀu djơ̆ kơnong mơng khul đôč ôh ăt mơng abih bang khul grup gum hrŏm kiăng gum djru, kiăng pơtô pơblang brơi hlăk ai amăng bruă mă”.

Hlâo adih, Khul hlăk ai rơnuk Hồ Chí Minh tơring čar Dak Nông lĕ anom bruă blung a amăng kual Dap kơdư pơphun Jơnum rơwang thun 2022-2027. Sa amăng hơdôm bruă mă yôm hloh mơng hlăk ai tơring čar Dak Nông, anun lĕ djru man pơdong plơi pla phrâo. Djop gưl amăng Khul hơmâo ngă pơgiong giăm 7.000 ring bruă, bruă jao brơi hlăk ai hăng abih tih rơnoh prăk rơbêh 38 klai prăk. Hlăk ai tơring čar Dak Nông ăt pla phrâo rơbêh 700.000 phun kyâo; pơjing 127 anih jơnum pơƀut, anih ngui ngor brơi hlăk ai čơđai; pơphun lu bruă mă djru brơi ƀing hlăk ai čơđai tơnap tap hăng abih tih rơbêh 15 klai prăk.

Hăng tơlơi jak iâu: “Hlăk ai Dak Nông ba jơlan hlâo, hrưn đĭ, pơčeh phrâo, pơđĭ kyar”, Khul hlăk ai rơnuk Hồ Chí Minh tơring čar Dak Nông tal IV, rơwang thun 2022-2027 ba tơbiă 12 grup hơnong pơkă, 8 akŏ bruă, jơlan hơdră akŏ phun hăng pran gir run kiăng hơdôm tơlơi pơmĭn jing bruă mă sit nik ba glăi tŭ yua. Yôm hloh lĕ hơdôm hơnong pơkă anun lĕ: rĭm thun pla phrâo 250.000 phun kyâo; djru brơi 10 boh ƀon lan tơnap tap ngă pơgiong tui hơnong pơkă plơi pla phrâo; djru brơi 200 klai prăk brơi hlăk ai čan prăk pơphun bruă mă; rĭm thun hrŏ trun rơbêh 6% mrô sang anŏ hlăk ai djuai ania ƀiă ƀun rin.

VOV Tây Nguyên/Siu Đoan: Pơblang