Hră lăi pơthâo amăng mông jơnum brơi ƀuh: 5 thun rơgao bruă mă gah tơdăm dra mut phung, bruă mă gah hlăk ai ling tơhan ăt pơsit tơlơi gơgrong, bruă mă hla kơ ba gru hlâo amăng bruă gah tơdăm dra mut phung, bruă hlăk ai, tơdăm ngek dra muai amăng dêh čar, djru tŭ yua biă mă amăng bruă akŏ pơjing kjăp ling tơhan, man pơdong hăng pơgang Lŏn ia. Tơlơi anun brơi ƀuh hlăk ai tơdăm dra amăng ling tơhan hơmâo pơdah thâo laih bruă mă gơgrong ba prong, anŏ kiăng dlông mơ̆ng pran jua hlăk ai kơ bruă či ngă.

Ƀơi lu puih kơđông tơhan prăp lui na nao kơsung blah, tơdăm dra mut phung hơmâo 80% mrô tơhan, ngă tui bruă mă jao tơhan blah ngă, pơgang lŏn ia, jing ƀing ngă bruă phun. 5 thun rơgao, abih bang khua mua, ling tơhan tơdăm dra mut phung ngă giong bruă jao, pơtô hrăm tơhan blah ngă, pơtô hrăm bruă mă pơkra pơjing…Anai lĕ tơhan hơmâo ƀuh ƀô̆ mơta ƀơi djop anih tơnap tap hloh, hŭi rơhyưt hloh djru mơnuih ƀôn sang ană plơi pla bong glăi hăng tơlơi truh sat, lŏn adai ngă, klin kheng, hơduah ĕp pơklaih mơnuih amăng mông ječ ameč, hơmâo pơsit laih tơlơi gơgrong ba bruă mă pơgang dêh čar, bơwih brơi kơ ană plơi pla. Djru hrom bruă mă ƀiă anet aneo amăng anun boh tơhnal prong, Thượng uý Phan Văn Linh, pô pơ ala gah tơhan quân đoàn 1 brơi thâo:

“Akŏ pơjing tơlơi pơmin kjăp kơđi čar hơđong, pran jua khăp kơ lŏn ia, tơlơi đăo kơnang tong ten hăng mơneč gah ling tơhan Việt Nam, đăo kơnang kơ tơlơi thâo, ia rơgơi, hơdră kơsung blah, mă yua phao kơtuang măi mok phrâo ră anai. Pơđĭ tui tơlơi beč bal hơdeč hmar, thâo pơčeh phrâo, hrưn đĭ, gir run, ƀư̆ pran jua, pơhrăm bong glăi kiăng juăt hăng tơlơi lông lăng hmar djop bruă mă, pran jua prăp kơsung blah, tơlơi thâo hluh djơ̆ tơlơi phiăn sit mă bruă, kiăng ngă giong bruă jao djop mông mơnit tơlơi hơmâo”.

Jơnum ruah khua hăk ai tơdăm dra rơnuk Hồ Chí Minh ling tơhan dêh čar

Hrom hăng anun, bruă mă hlăk ai thâo pơčeh phrâo laih anun bruă ngă apah bơni kơ hlăk ai thâo pơčeh phrâo ia rơgơi hơmâo ƀuh hơdôm rơtuh mơta tơlơi pơmin pơčeh phrâo tŭ yua, pơbŭ brơi kơ tơlơi thâo ia rơgơi kơ mơnuih hlăk ai kơhnâo amăng ling tơhan. Hơdôm rơbâo ring bruă pơčeh phrâo tơdơi kơ hơmâo mă pri apah bơni ăt ƀing pơčeh rai ñu hlăk ngă pơgiong, ba yua sit nik bơwih brơi kơ dêh čar rĭm thun rơnoh tŭ yua pơkrem kơ kơnuk kơna hơdôm rơtuh klai prăk. Hok mơak hơmâo mă pri apah bơni kơ hlăk ai pơčeh phrâo, Trung tá Hoàng Văn Tiến, Gah anom pơtô hrăm ĕp lăng amăng adai rơngit, sang hră Tơlơi thâo rơgơi gah ling tơhan lăi:

“Ƀing gơmơi hok mơak biă mă yua ba tơlơi gơmơi hor, tơlơi pơmin mơ̆ng ta kơsem min pơjing rai gơnam mă bruă phrâo rơgơi, bơwih brơi bruă mă phrâo rơnuk anai kơ ling tơhan”.

Ƀơi anăp kơ bruă mă phrâo kiăng hơduah ĕp, pơmin dơlăm pran kơtang mă bruă samơ̆ ăt hok mơak mơ̆n hăng ƀing hlăk ai ling tơhan pơ anăp anai, Jơnum ruah khua hlăk ai tơdăm dra mut phung ling tơhan tal anai hơmâo pơsit tơhnal pơtrun lu hloh 10 tơhnal pơkă amăng rơwang bruă ngă tui mơ̆ng thun 2022-2027. Laih dơ̆ng lăi pơthâo rơđah 3 bruă mă khom phrâo hloh. Anun lĕ, phrâo hloh kơ bruă pơhrăm tơlơi pơmin pran jua hơkrŭ; phrâo hloh kơ bruă pơtô hrăm blah ngă, prăp lui blah ngă, pơtô pơjuăt, kơsem min ia rơgơi phrâo, hrăm tơlơi dêh čar tač rơngiao, tơlơi pơhiăp djuai ƀiă, ngă khua pô, mă yua phao kơtuang măi mok phrâo pơkra ming hăng pơjing rai lu mơta phao kơtuang phrâo, ba yua boh thâo ia rơgơi tơlơi pơhing, pơčeh phrâo mă yua mrô ia rơgơi amăng bruă man pơdong tơlơi juăt mă bruă tơpă, ƀư̆ pơkra tơlơi hơdip, dŏ dong ƀong huă thâo hluh ngă tui djơ̆ tơlơi phiăn, khut khăt pran jua mă bruă pơhlôm rơnuk rơnua.

Khua tơhan krên dên ơi Phan Văn Giang pơhiăp git gai jơnum

Bruă mă gah khul hlăk ai hăng tơdăm dra mut phung, hlăk ngă tui boh yômphun amăng hră pơtrun mơ̆ng jơnum khua mua, akŏ bruă gah ping gah, bruă mă kơđi čar mơ̆ng rĭm puih kơđông, kah hăng čih pơthâo amăng mông jơnum mơ̆ng Trung tướng Trần Hoài Trung, dong kơna ping gah Quân khu 7 hơmâo lăi:

“Djop gưl ping gah, kơđi čar, mơnuih ngă khua anom bruă kơđi čar hơmâo git gai pơčrâo trun, ngă gêh găl klă hloh kơ bruă mă tơdăm dra hlăk ai laih anun bruă mă khul hlăk ai pơđĭ kyar, djru hrom tơhan blah ngă amăng quân khu pơgiong sit nik tŭ yua bruă jao. Thâo hluh tong ten tơlơi anun, bruă mă, tơlơi gơgrong ba, boh yôm amăng bruă hlăk ai tơdăm dra, abih bang tŭ ư sa pran jua djop bruă ngă anŏ hơgĕt khom kiăng ngă truh kih, hmar hăng tŭ yua hiam klă, khom hơmâo tơlơi git gai, khom hơmâo mơnuih pơčrâo bruă laih anun khom hơmâo bruă ngă hrom, amăng anun bruă mă mơ̆ng khul hlăk ai tơdăm dra mut phung yôm biă mă”.

Hơdôm tơhnal pơtrun kơ hlăk ai ling tơhan amra djru hrom akŏ pơdong bruă ling tơhan hơbôt, kơtang, ngă atur kơ bruă mă kjăp hrưn đĭ truh thun 2030 ling tơhan phrâo hăng kơtưn tơlơi thâo rơgơi, pran kơtang pơgang lŏn ia dưi thâo hmar hloh, mơ̆ng ataih, hlăk djru kơ bruă kơsem min ngă kjăp tơlơi thâo djru ngă kjăp ačăng kiăng thâo por. Kơ-iăng Khua git gai ping gah ling tơhan dêh čar, Khua ding jum ling tơhan, khua tơhan krên dên ơi Phan Văn Giang lăi rơđah tui anai amăng mông jơnum:

“Ping gah ling tơhan dêh čar, khua mua ding jum ling tơhan đăo kơnang kơ abih bang hlăk ai tơdăm dra ling tơhan, laih dơ̆ng ăt đing nao hăng ngă gêh găl hloh pioh kơ ling tơhan ngă tui djơ̆ tơlơi kiăng, bruă hur har pơyơr pran jua amăng bruă mă akŏ pơdong ling tơhan mơnuih ƀôn sang Việt Nam hơkrŭ kjăp, sit nik, beč bal, ngă tui hơdră phrâo, man pơdong hăng wai pơgang kjăp lŏn ia dêh čar Việt Nam xã hội chủ nghiã. Rơkâo kơ ƀing gih hlăk ai tơdăm dra gir run hloh kiăng ngă tui lăp hăng tơlơi đăo kơnang mơ̆ng ping gah ling tơhan dêh čar, Ding jum ling tơhan.