Hlăk ai ƀơi 13 puih kơđông tơhan hăng hơdôm anom bruă Pơtŏp tơhan - Tơhan rŭi hyu hơdeč, Tơhan pơgang guai ia rơsĭ gah Anom bruă khua tơhan pơgang guai tơring čar Dak Lăk tuh rơyuh pơphun bruă djru ba mơnuih ƀôn sang kah hăng čuă jơmư, ƀơk gơnam kơ sang anŏ tơnap tap, sang anŏ ngă hơkrŭ; brơi prăk hrăm hră kơ čơđai sang hră ƀun rin hrăm thâo; pơkra ming hơdôm ring bruă, anih gru phun yom ƀơi guai ia rơsĭ wơ̆t hăng ƀơi kơdư.

Tơlơi hmư̆ hing lăp hơdor mơ̆ng hlăk ai Tơhan pơgang guai Dak Lăk tal anai lĕ pôr pơthâo, pơblang brơi tơlơi phiăn kơ tơlơi ngă pô wai lăng ia rơsĭ, bul pơtâo, rơnuk rơnua ƀơi guai čar, laih dong pơmut hrŏm pôr pơthâo kơ hrơi ruah khua pơ ala mơnuih ƀôn sang dêh čar tal 16 hăng khul khua pơ ala djŏp gưl rơwang thun 2026-2031, pơƀut kơ tơlơi dưi, bruă kiăng ngă mơ̆ng mơnuih nao plĕ hră. Mơ̆ng anun, pơđĭ tui tơlơi pơmin kjăp kơđi čar, tơlơi thâo gơgrong bruă kơ ƀing hlăk ai, tơdăm dra, mơnuih nao plĕ hră jing mơnuih ƀôn sang pơ guai dêh čar amăng bruă ngă tui tơlơi dưi, tơlơi jao bruă, djru akŏ pơdong Kơnuk kơna hơdip tui tơlơi phiăn./.