Hơdôm anung asơi añăm djru ba khăp pap mơ̆ ƀing nai pơtô, ƀing mơnuih čơmah djru rĭm hrơi hơmâo pơtrut pran jua čơđai sang hră gir run hrăm hră, čung ba čơđai sang hră djuai ania Sedang pơ anai nao hrăm hră.

Tơdơi kơ mông hrăm hră pơ anih, amôn Y Minh Tuyết, čơđai sang hră hrăm anih 5B pơ sang hră hrăm hăng čem rông ba čơđai sang hră gưl sa Măng Cành, să Măng Cành, tơring glông Kon Plong, hăt he pač ƀô̆ mơta, rao tơkai tơngan laih anun hrŏm hăng 187 čô gơyut ñu ha hnơr hăng 8 boh anih pơkŏn pơtum pơ sang apui, anih huă asơi ƀơi sang hră. Asơi añăm yua kơ ƀing nai pơtô djru hơtŭk riă tơnă hơbai brơi kơ čơđai sang hră huă ƀong yang hrơi dong hơmâo mơnong akan, añăm mơnong hăng añăm ia hla rơ̆k. Amôn Y Minh Tuyết lăi:

“Sang anŏ pơ plơi Măng Pành. Kâo kiăng dŏ pơ sang hră hrăm hră đôč, kiăng hrăm, hmư̆ nai pơtô thâo thăi laih anun hơmâo asơi huă trơi pơđao. Pơ anai, asơi hiam añăm jơman hloh pơ sang, pơ sang huă asơi ƀu hơmâo añăm mơnong hrup pơ anai ôh”.

Thun hrăm 2023-2024 sang hră pơtô hrăm čem rông ba čơđai sang hră djuai ania ƀiă gưl sa Măng Cành, hơmâo 272 čô čơđai sang hră, amăng anun 57 čô đôč mrô čơđai dưi tŭ mă prăk djru mơ̆ng hră pơtrun mrô 116 thun 2016 kơnuk kơna pơsit. Lu čơđai sang hră pơkŏn ƀu hơmâo tơlơi djru ba ôh samơ̆ sang anŏ tơnap tap ƀun rin, sang ataih mơ̆ng sang hră anun yơh, khua mua sang hră ăt gir djă pioh anih huă ƀong čem rông ba čơđai sang hră ƀun rin, wơ̆t hăng 85 čô ƀơi 6 boh sang hră čơƀeng pơkŏn. Nai Trần Thông, Khua sang hră gưl sa Măng Cành brơi thâo, bruă ngă rim hrơi hơtŭk riă tơnă hơbai asơi añăm kơ čơđai sang hră, ngă kơ ƀing nai pơtô pơđĭ tui lu bruă mă, ăt tơnap lu hloh mơ̆n samơ̆ pơmin yua ngă bruă hơtŭk riă tơnă hơbai asơi añăm lĕ bruă ngă khăp pap kiăng pơtrut pran jua kơ čơđai sang hră nao hrăm hră hơđong pran jua:

“Djă hnong bruă mă pơphun tơñă asơi añăm kơ čơđai muai, či tlam lĕ gêh găl hloh kơ čơđai sang hră. Boh nik ñu amăng bơyan hơjan tơdah ƀu hơmâo asơi huă yang hrơi dong, či tlam ƀing čơđai glăi ƀu pơwơ̆t glăi pơ sang hă dong tah. Djă pioh mông huă ƀon yang hrơi dong lĕ klă yơh kiăng djă pioh mrô čơđai sang hră nao hrăm hră či tlam”.

Kơ bruă pơphun brơi čơđai dŏ glăi pơ sang hră, hơdôm čơđai hơmâo anăn tui Hră pơtrun mrô 116/2016/NĐ-CP amăng thun hrăm 2023-2024 lĕ him lăng 1.900 čô čơđai sang hră hơmâo 829 čô čơđai sang hră gưl sa, 871 čô čơđai sang hră gưl dua mơ̆ng 14 boh sang hră hrăm hăng dŏ glăi huă ƀong ƀơi sang hră mơtam. Lu sang hră dăp hơdră pơdong anih dŏ glăi, anih pit đih, anih hrăm hră, sang huă ƀong, dăp hơdră blơi mơnong ƀong huă rim hrơi. Kiăng dưi djă pioh bruă tơñă asơi čem rông ba kơ 1.250 čô čơđai sang hră hơmâo mơnuih ƀôn sang djru hrŏm ƀơi 4 boh să, tơring kual, hơmâo Măng Cành, Pờ Ê, Đăk Tăng hăng tơring kual Măng Đen, anom bruă pơtô pơjuăt tơring glông Kon Plong ngă tui lu hơdră hăng hơmâo tŭ mă tơlơi dong yua mơ̆ng gong gai kơnuk kơna, djop khul grup mơnuih mơnam hăng ƀing čơmah djru hrŏm.

Rơđah biă ñu, kơčăo bruă čem rông adơi mơ̆ng khul pơyơr pran jua Tơlơi đăo kơnang hăng kơčăo bruă rông adơi Dap Kơdư hơmâo djru 397 čô čơđai sang hră, rim čơđai sang hră djru 17.000 prăk sa hrơi; Keh prăk djru čơđai sang hră ƀun rin kual čư̆ siăng kơčăo bruă Anung asơi hơmâo añăm mơnong djru ba mông huă ƀong brơi kơ 850 čô čơđai sang hră, amăng anun 412 čô čơđai sang hră gưl muai hăng rơnoh prăk djru 8.000 prăk laih anun 438 čô čơđai sang hră gưl sa, čơđai sang hră gưl dua lĕ 10.000 prăk.

Rơngiao kơ anun, djop sang hră hơmâo jak iâu, pơtrut lu mơnuih čơmah, lu sang anŏ pơdrong thâo djru hăng lu khul bruă amăng tơring čar hăng gah rơngiao tơring čar, amĭ ama čơđai sang hră djru braih, añăm rơ̆k, hơbơi pơtơi, hrơi bruă gum hrŏm kiăng tơnă hơbai brơi čơđai sang hră hơmâo asơi huă añăm ƀong hiam jơman amăng anih mơnuih ƀôn sang rông ba, ngă gêh găl klă hloh kơ ană amôn čơđai sang hră hrăm hră hơđong pran jua amăng thun hrăm 2023-2024. Nai Nguyễn Minh Cường, Khua anom pơtô hăng pơjuăt tơring glông Kon Plong brơi thâo, amăng tơlơi gêh găl prăk kăk djru ƀu lu ôh, kiăng pơhlôm brơi djop mơnong ƀong huă kơ ƀing čơđai sang hră, nai pơtô hăng khua sang hră hơmâo jak iâu thim dơ̆ng kiăng djru hrŏm.

“Lu khua sang hră jak iâu amĭ ama čơđai sang hră djru braih, añăm pơtam, pơdai kơtor. Sang anŏ blơi ƀu hơmâo ôh, ăt djru ba djuh, ia, pran jua hrơi bruă, kah hăng hrơi dong djru tơnă asơi hơbai añăm kơ čơđai sang hră huă ƀong. Bơ črăn pơčruh hrŏm Anom bruă Pơtô hăng pơjuăt gum hrŏm djop să, tơring kual, abih bang khua sang hră iâu pơthưr ƀing pơdrong sah, djru gơnam hăng prăk kăk hơdôm hơmâo, kah hăng djru mi tôm, akan krô, ia rơmă”.

Ƀuh rơđah bruă djă pioh anih pơphun huă ƀong čem rông čơđai huă yang hrơi dong giăm 1.250 čô dŏ glăi pơ sang, mơnuih ƀôn sang djru ba, tơlơi glăm ba phun lĕ yua ƀing nai pơtô amăng sang hră. Hơdôm wơ̆t huă ƀong tui anun, ngă kơ ƀing nai jai tơnap gleh glar lu hloh samơ̆ buă hăng tơlơi khăp pap hlăk djru hrŏm pơtrut pran jua ba tơlơi thâo kơ čơđai adơi đeh anăn amôn gir run hrăm, čơđai djuai ƀiă Sedang tơring glông Kon Plong, tơring čar Kon Tum dưi nao sang hră, hrăm hră hơđong hloh.